– Kan vera ein skatt for nokon andre

Komande laurdag skipar Omvikdalen Bygdekvinnelag til bruktmarknad i Skyttarhuset på Seim.

– Det vert bruktmarknad med klede og sko, både barneklede, vaksenklede og alt mogeleg anna. Her har folk kjøpt seg eit bord kvar som dei kan selja frå, og me har sagt at kvar seljar kan ha med seg maks femten plagg. På den måten skal me unngå at det blir for kaotisk, fortel talsperson Mariann Hovda Gausvik.

Nøysemd

I fylgje Gausvik er det veldig mykje fint som skal seljast.

– Eg har sett bilete av noko av dei, og det er både sommarklede og klede som framleis har prislappane hengande på. Her var det mykje lekkert, og eit fint høve til å gjera seg nokre gode kupp, lovar Gausvik.

– I god bygekvinnelagstradisjon vert det også kafé, der ein kan setja seg ned og nyta ein drøs med andre som stikk innom, legg ho til.

Bruktmarknaden er også heilt i tråd med ein landsdekkjande kampanje som startar no hjå Bygdekvinnlaga, som tek for seg nøysemd. Noko Gausvik er klar på at dekkjer meir enn berre gjenbruk av klede.

– Dette handlar også om mat, det å bruka maten og matrestane, men det handlar også om å ta vare på tinga ein har. Det å reparera, anten det er ting eller tekstilar. Det er viktig at me lærer opp og bevisstgjer dei som kjem etter oss om at me godt kan kjøpa brukte ting, og det er Bygdekvinnelaget ein god pådrivar på, understrekar Gausvik.

– Me blir kjempeglade for alle som kjem og vil nytta seg av dette. Det som du ikkje lenger vil ha, kan vera ein skatt for nokon andre, avsluttar ho.