Quiza seg med LivOGLyst

Kva betyr kvinnherske ord som vippevele, firrebya og skirpen? Det er slikt ein får svar på når prosjektet «Møteplassen» i Uskedalen inviterer til quiz.

Fredag inviterte LivOGLyst-prosjektet «Møteplassen» til den uslåelege kombinasjonen sosial samling og spørjekonkurranse. Det er Uskedalen Utvikling som har hatt tråden i det LivOGLyst, og meininga er å skapa trivsel og vekst i lokalsamfunnet. Med «Møteplass» har Uskedal Utvikling ønskt å setja i gang tiltak for å halda på ungdomen og hindra fråflytting

– Det er å investera i eiga framtid å få ting til her i Uskedalen, seier Solveig Haugland, som er ein av arrangørane av quizen.

Vil meir

Prosjektet fekk 80.000 kroner til å få i sving tiltak, som mellom anna betydde at quizen fredag gjekk utan deltakaravgift. Ni lag sessa seg til for å bryna seg på det Bjarte Døssland hadde funne formålstenleg å spørja om. Han doserte ut fem skarpe kategoriar til ditto skarpe deltakarar, og let folket bryna seg på heimkunnskap, landkunna, bibelkunna, lovkunna og kvinnherske ord snappa opp frå Kvinnherskringlo.

– Det er LivOGLyst-pengar som gjer det mogeleg. Ein hadde ei idémyldring i fjor for å finna aktivitetar for bygda, og då var kveldar som dette blant det ein ønskte å få til. Det er kjekt å ha litt midlar til å gjera slikt for. Me har mykje me ønsker å ta opp att her i Uskedalen, som Solfjelløpet, Hopp i havet og Sykkelrebus, for å nemna noko av det ein har samla bygda rundt tidlegare, legg Haugland til.

Halve gleda med å gå på quiz er å koma derifrå med kunnskap ein ikkje hadde på veg inn. Og om du har lese deg heilt hit, fortener du å få svar på spørsmåla i ingressen. Ein vippevele er ein vimsete person, ei firrebya er ei kort, stri regnbye og skirpen er ein når ein er smørblid. Så veit du det.