Fleire tilsette og halverte gebyr

Forvaltningsseksjonen i Kvinnherad kommune har hatt mange utfordringar dei siste åra. Men no kan tilhøva bli betre, samstundes som politikarane ivrar for å kutta i gebyra.

Som Grenda har referert mange gonger dei siste månadane, har politikarane ikkje vore nøgde med at sakshandsamingstida innan plan- og byggjesaker har vore svært lang. Dei har difor stadig kravd at noko må gjerast. I formannskapet på torsdag viste Leif Sverre Enes (H) til at det i heile 2019 berre vart godkjent to private reguleringsplanar i Kvinnherad. Det gjaldt utleigefritidsbustader på Raudholmen på Varaldsøy og trebåtsenter i Gurinefjæro i Rosendal.

– Dette er eit dårleg teikn, sa Enes.

Han la også merke til opplysninga om at kommunen sine inntekter frå private reguleringsplanar og kartforretningar ligg om lag 450.000 kroner under budsjettet. Samstundes skal reguleringsplanar finansierast med 100 % sjølvkost i 2020.

– Det står «100% sjølvkost», dette må vi sjå veldig nøye på. Det er veldig dyrt å laga reguleringsplanar i dag, og i tillegg er det eit vanvitig arbeid med å dokumentera alt opp og i mente. Viss vi ikkje gjer noko med dette, så vil alt stoppa heilt opp. Kommunen må vera med og letta på trykket for dei som lagar private reguleringsplanar og ta ein del av kostnaden, oppmoda han.

 

50% reduksjon

Ikkje overraskande var Ove Lemicka (Frp) heilt samd.

– Skal vi få utvikling i Kvinnherad, så må vi få inn fleire byggje- og reguleringssaker, sa han, og følgde opp med å føreslå å gje administrasjonen i oppgåve å redusera gebyret for plan- og byggjesaker som vert fremja i år og ut 2020 med 50%.

Hilde Enstad (Ap) var i utgangspunktet litt skeptisk.

– Vi veit ikkje kor mykje det vil kosta oss, sa ho.

– Eg meiner det vil gje auka inntekter. Vi skal få inn mange fleire saker, i staden for at folk let vera fordi det er for dyrt, kontra Lemicka.

– Det kjem gjerne litt bardust på, men vi er i ein spesiell situasjon, så la gå, støtta Leif Sverre Enes.

Dermed vart også Enstad med på laget, medan Hege Lægreid Røssland (SF) stod imot.

– Det er ikkje politisk forsvarleg handsaming å ta stilling på ståande fot til noko som kan få store økonomiske konsekvensar, argumenterte ho.

 

Greia ut

Kommunedirektør Ragnhild Bjerkvik lova å greia ut moglege effektar av forslaget før kommunestyremøtet på torsdag. Dermed fekk innspelet til Lemicka sju røyster for og berre to imot (Røssland og Marit Årthun ), men kommunestyret har siste ord.

Bjerkvik føreslo elles å styrka seksjon forvaltning med 1 million kroner, noko som vil gje fleire tilsette.

– Formannskapet uttrykte ynske om at vi skal gjera det, og vi har teke dei på ordet, sa ho.

– Dette er musikk i øyro på meg og sikkert heile formannskapet. Eg vonar på full effekt veldig snart, smilte Leif Sverre Enes.