Han blir ny fabrikksjef i Ølve
Etter 15 år som fabrikksjef ved Palfinger i Ølve går Arvid Skogseide av med pensjon i mai. Då står Kim Røssland (44) frå Husnes klar til å ta over.
I løpet av ei 22 år lang Palfinger-karriere har Kim Røssland hatt fleire spanande jobbar. Han starta som montør for det som då var Schat Harding på Seimsfoss i Januar 1999, og har sidan då hatt ei rekkje titlar i konsernet. Dei siste sju åra innan HMS og Kvalitet, blant anna som HMS og kvalitetsansvarleg globalt. Men 1. mars gjekk han offisielt inn som fabrikksjef i Ølve.
Artikkelen held fram under annonsen.
– Det vert ein overgangsperiode der eg og Arvid skal jobba saman fram til han går av med pensjon 20. mai. Så då får eg sjansen til å læra enno meir av Arvid. Aller helst skulle eg sett at vi kunne ha jobba saman lengre, for Arvid er veldig flink og sit på utruleg stor kompetanse og eg har lært utruleg mykje av han, seier Kim.
Kim fekk spørsmålet om han kunne tenka seg jobben som fabrikksjef tidlegare i år, blant anna etter anbefalingar frå Arvid sjølv.
– Eg kjem nok til å følgja med på kva som skjer her etter at eg har slutta, men eg er heilt sikker på at bruket er i dei tryggaste hender med Kim som sjef, smiler Arvid.
Har klokketru på framtida
Hovudpersonen sjølv er klar for å bretta opp ermane for oppgåvene som ventar, og har stor tru på det dei held på med i Ølve.
– Eg har tru på det vi held på med og eg har tru på det vi kan få til her. Verdien vår er kompetansen og kvaliteten vi leverer, og der er det ingen andre som kan konkurrera med oss, slår Kim fast.
Med to år på baken på Ølve-kontoret, kjenner Kim allereie dei 80 kollegaene han no vert sjef for. Så skal han gjera sitt for å legge til rette for at dei kan prestera så godt som mogleg.
Artikkelen held fram under annonsen.
– Det er mange utfordringar og det er ein tøff bransje vi opererer i. Vi må produsera eit kvalitetsprodukt i løpet færrast moglege timar for å vera konkurransedyktige. Jobben min blir å finna effektive måtar å jobba på slik at vi held fram å produsera betre og kjappare enn konkurrentane våre, seier husnesguten som gjorde hatlestrening av seg 2013.
Om dagen er det full rulle i produksjonshallane til Palfinger på Ølve. Blant anna vert livbåtane og tenderane, som skal leverast til Celebrity Cruises neste år, bygd.
– Vi har mykje arbeid og det er travelt om dagen. Ingenting er betre enn det, og vi har tru på at det skal vera slik her i Ølve i mange år framover. Eg ser i alle fall lyst på det, så blir det opptil meg å legga til rette for at mine Dyktige kollegaer i produksjonen får den støtta dei fortener, sluttar han.