Ragnhild i storslag på Lygna

Ragnhild Femsteinevik reiste frå Lygna Skisenter med både gull og sølv i bagasjen etter to norgescupsprintar.

16. og 17. januar var det klart for to sprintrenn i Norgescupen i skiskyting på Lygna Skisenter. Her var det Ragnhild Femsteinevik frå Hatlestrand som viste prov på best form i kvinneklassen.

For sjølv om det vart éin bom begge dagane, var farten i sporet så bra at Ragnhild gjekk i mål til sølv på laurdagen og gull på søndagen.

Søndagen var ho så suveren at ho var eit minutt betre enn neste kvinne, sjølv om ho hadde éin bom meir. Laurdagen var det den eine bommen på siste skyting som kosta ho gullet, Ragnhild måtte med det ta til takke med sølv etter å ha kryssa mållinja 19,5 sekund bak vinnar Mari Wetterhus.

 

Ikkje full klaff

Storebror Martin stilte til start på herrane sine to sprintar denne helga, han fekk det langt tøffare enn søstera. Laurdagen vart det to bom på standplass, og ein skuffande 21. plass på den lovande skiskyttaren. Han måtte med det sjå seg slått med eit minutt og 42 sekund av Lars Helge Birkeland.

Søndagen fekk Martin luka vekk ein bom på standplass, men fekk ikkje nok fart på skina til å kjempa om medaljane. Herman Borge sklei i mål til suverent beste tid, 1,12,6 føre Martin som vart nummer sju.