Jubla for eventyrleg dag i Fjellhaugen

Mykje snø, blå himmel, fantastiske løyper, enormt med folk og parkeringskaos. Årets sesongopning hjå Fjellhaugen skisenter kunne konkurrera med ein god påskedag.

 

- Vi har rekna ut at det er 325 dagar sidan førre gong skitrekket var ope, kunne ei av eldsjelene, Sissel Haugen, fortelja.

Fjorårets sesong gjekk i vasken grunna snømangel, og sidan den gong har det vorte utført enormt med dugnadstimar for å oppgradera og vedlikehalda anlegget.

- Det har blitt lagt ned nokre hundre timar berre sidan 1. januar. Men det er jo ein fantastisk dag å opna opp på, smilte dagleg leiar Øystein Svendsen i Fjellhaugen skisenter.

- Dette er 17. mai, julaftan og gebursdag på ein gong, jubla Sissel Haugen.

Ein tur ned i kiosken avslørte at dagsomsetninga kring klokka 13.00 på søndag var kring 50.000 kroner i sal av kort og litt snop.

- Dette er på høgde med ein god påskedag. Vi vona jo på ein god opningsdag, men dette overgår alle forventningar. Men vedlikehald og dyrt, så pengane kjem godt med, slo Svendsen fast.

 

Les meir i Grenda på tysdag.