Aksjonerte i Bergen: – Dei får ein møkapakke tilbake frå oss

Nestleiar Marianne Nordhus i Vestland bondelag var med då bøndene aksjonerte utanfor «Høyres Hus» i Bergen fredag morgon.

Torsdag vart det brot i jordbruksforhandlingane mellom bøndene og regjeringa. I ei pressemelding skriv Vestland bondelag at regjeringa ikkje har forstått alvoret.

– Avstanden var for stor mellom regjeringa si forståing av røynda og det inntektsløftet vi meiner er heilt naudsynt. Difor bryt vi, seier leiar Anders Felde i Vestland bondelag i ei pressemelding.

Jordbruket har kome med eit krav på 2.114 millionar kroner, pluss ein ekstraordinær investeringspakke for overgang til lausdrift av storfe på 450 millionar kroner for 2022. Regjeringa svarte med eit tilbod på 962 millionar kroner.

– Tilbode viser manglande vilje til å følgja opp Stortinget sin politikk om at inntektene til bønder skal nærma seg andre grupper, og ha eit landbruk over heile landet, seier Felde.

Møkapakke

Bøndene viser sin frustrasjon ved å aksjonera rundt om i heile landet fredag. Blant anna var dei på plass utanfor «Høyres Hus» fredag morgon, kor dei la ned møk.

– Tilbodet regjeringa kom med var eit møkatilbod. Difor får dei ein møkapakke tilbake frå oss. Dette er ikkje godt nok, seier Marianne Nordhus til Bergens Tidende.

Ho fortel vidare at dei hadde større forventningar til årets forhandlingar, og at det no er stor frustrasjon blant medlemene.

– Nok er nok. Avstanden er altfor stor. Vi er ikkje blitt møtt på nokon av dei viktigaste punkta, seier ho til BT.