– Eg kjente det litt, men ikkje mykje

Torsdag føremiddag klokka 09.20 starta koronavaksineringa i Kvinnherad. Odd Saltnes på Husnestunet var førstemann ut.

– Eg er ikkje spent, eg har fått så mange sprøyter før at eg veit korleis det er, svarte Odd på spørsmål om kva han følte før han skulle få stikket av sjukepleiar Hege Kristin Raudstein torsdag morgon.

 

Ikkje vore redd

Med god hjelp frå sjukepleiar Michelle Olsen Harsvik og einingsleiar Anne Tangen Rørdal, vart vaksinen sett utan noko form for dramatikk i pårørandestova på somatisk avdeling på Husnestunet.

– Eg kjente det litt, men ikkje mykje, sa Odd før han vendte seg til Hege Kristin:

– Eg og du vert berømte, vi no. Jøye meg. Det er mange ting ein kan bli berømt for, spøka han.

Han var glad for å ha fått den første av to dosar med vaksine. Om tre veker, når andre dose er klar til å setjast, treng ikkje Odd tenkja på koronaen på same måte som før, då er han nemleg immun.

– Det har vore ei lang tid dette her, og det er mang slag ein skal gjennom. Men eg har ikkje vore redd, det har eg ikkje, slår 86-åringen fast.

 

Alle langtidspasientane

Odd var den fyrste av mange som fekk vaksine denne torsdagen. Vaksinen kom til Kvinnherad seint onsdag ettermiddag, og vart plassert på kjøl fram til torsdag morgon. Då vart den levert ut i kjølekonteinarar til både Husnes- og Halsnøytunet.

– Vi har fått dosar til å setja på alle langtidspasientane våre. Vi er litt usikre på kor mange dosar vi får opp frå eit glas, men vi håper å få gitt alle langtidspasientane på Husnes- og Halsnøytunet den fyrste dosen i dag, sa einingsleiar Anne Tangen Rørdal torsdag morgon.

Går alt som planlagt vil dei 49 langtidspasientane på Husnes og Halsnøy få vaksine torsdag. 32 av dei bur på Husnestunet, medan 17 av dei bur på Halsnøy.

For å få dette til hadde dei frigjort sjukepleiarkapasitet på Husnestunet denne historiske dagen, i tillegg hadde dei fått på plass ekstra personell til observasjonen i etterkant av vaksinen.

– Det er viktig at pasienten skal observerast i 30 minutt etter stikk, seier Rørdal.

 

Første dag i ei ny tid

Ut frå det fyrste glaset klarte sjukepleiarane på Husnestunet å få ut seks dosar. Gjer dei det med resten ligg dei godt i rute i forhold til planane sine.

– Det er eit puslespel å planleggja dette her, men dei tilsette har planlagt dette i to dagar no, og følgjer ei bruksrettleiing frå helsemyndigheitene. Så eg er har stor tiltru til at dette kjem til å gå smurt, seier Rørdal og legg til:

– Men det er klart at dette er ein spennande dag, ikkje for at vi skal vaksinera, for det kan vi. Men det er på mange måtar den første dagen i ein ny periode kor det er håp om at ting skal endra seg og bli normalt.