Tronskifte i Grenda-ligaen

Det måtte ein lord til for å få «Kongelaget» ned frå trona i Grenda sin Fantasy-liga.

Tom-Marcus Hall og hans «Lordhall» klatra forbi Rolf Vidare G. Grønstøl og hans «Kongelaget» etter å ha sanka 45 poeng denne runden. Med det ligg hans lordar tre poeng føre Rolf Vidar sine kongar etter åtte rundar med Fantasy.

Både Tom-Marcus og Rolf Vidare gjekk på ein smell ved å ha Sterling som kaptein, men Tom-Marcus tente meir på at han har plassert sine pengar i Liverpool-juvelen Mané i staden for Salah. Manageren til «Lordhall» har ingen planar om å gje frå seg leiinga med det fyrste.

– Nei, eg er komen til topps for å bli, og har planar om å vinna ligaen, seier han.

Gjer han det har han lyst til å sjå favorittlaget Chelsea i aksjon. Har du planar om å utfordra han, trur han det kan vera lurt å plukka i alle fall to frå Frank Lampard sitt mannskap.

– Du bør ha spelarar som Mané, Abraham, Mount og kanskje nokon frå City om du skal gjera det godt, sluttar han.

Ein som gjorde det godt denne runden, og såleis fekk ein god start på oktober, var Tore Vevik og hans «Trio». Han samla 66 poeng i runde åtte, og fekk mest av alle i Grenda-ligaen. Det med nemnte spelarar som Abraham, Mount og Mané i laget.

I andre enden av tabellen er det verd å nemna at vår komande ordførar, Hans Inge Myrvold, er den manageren, av dei som har vore med i frå fyrste runde, som har samla minst poeng. «Myrvold Utd» står nemleg oppført med 277 poeng så langt og ligg med det på ein 285. plass i Grenda-ligaen. Til hans forsvar så har han enno ikkje gjort eit einaste byte, noko som verkeleg er på tide.