For tredje gong på kort tid er det gjort hærverk på turstien til Kaldestadåsen: - Det er svært fortvilande

Søndag morgon fekk Bjørn Heimvik i Turstiar Sunde telefon om hærverk, igjen. Det er blitt slengd vekk store steinar og steinheller, og hærverket er også denne gongen omfattande.

Hærverket som fyrst blei gjort på turstien til Kaldestadåsen siste helga i mai, og andre gongen den påfølgjande helga, har no skjedd igjen. Søndag ettermiddag hadde Heimvik vore på turstien for å sjå på skadane. På vegen møtte han mange turgåarar som både var fortvila og frustrerte over hendinga, spesielt dei som nyttar turstien som ei helsegevinst.

– Eg klarar ikkje å følgja tankesettet her, det er meiningslaust. Hadde me ikkje gjort noko arbeid på turstien hadde kvar og ein gått i gjørma. Eg har i fleire år følgt med på trafikken opp Kaldestadåsen, og det er eit heilt anna besøkstal enn det var tidlegare. Det er difor viktig med vedlikehald av turstien. Mange av turgåarane er dårlege til beins, og no fortel fleire at dei ikkje våga å gå lenger, og det er synd, fortel Heimvik og legg til:

– Det er svært omfattande å rydda opp i slikt. Etter dei førre hærverka brukte me 20 dugnadstimar og rundt 30.000 kroner. Steinhellene må mellom anna bli frakta med helikopter. Men det som drar mest er alle dei dugnadstimane me legg i det, seier han.

Umotiverande

Heimvik meiner skadane som er blitt utført tydar på at det er fleire involverte. Dette på bakgrunn av storleiken på steinane som er blitt kasta vekk frå stien.

– Eg var å såg på skadane i går, og nokre av steinane vil vera umogleg å få opp igjen. Denne gongen drar det i begge retningar om me skal rydda opp i det eller ikkje. Det heile er umotiverande og frustrerande. Eg synast det er ubehageleg å ikkje veta om det vil skje igjen. Er vedkommande ferdig? Kva skjer? Me er usikre. Når dugnadsgjengen kjem att frå ferie skal me ta ein runde på kva me skal gjere, opplyser ein fortvila Heimvik.

Denne gongen har vedkommande lagt igjen ein beskjed i turboka ved rastehytta på toppen.

– Det var også ein helsing til oss i turboka. Det er fyrste gong me har fått eit signal frå vedkommande. I meldinga stod det «Redd åsen! Rydd ein stein du og. Ja til ein steinfri ås». Turboka med beskjeden i vil bli overlevert til politiet, avsluttar han.