Publikumsrekord minutt frå avlysing

Etter at Silja Sol måtte gå av scenen på grunn av regn og vind, var det like før resten av kvelden måtte avlysast. Men så snudde vêret og festen kunna ta av for alvor.

Festidalen har blitt meir enn berre ein tonesett fest på eit jorde. No famnar festivalen vidt, med Festidagen for barna, Festivalkro for dei føredragslystne, næringsseminar, Lambaslepp og Festifjellet. Musikken på jordet til Dønhaug Gjestegard er likevel navet som festivalen roterer om, og i år vart det på ny publikumsrekord på jordet.

2200 fann vegen inn for å høyra på OnklP, Honningbarna og Veronica Maggio på fredag, medan 2000 svinga seg til DeLillos og Skambankt på laurdagen.

– Dette er førebelse tal. Me maksa på fredagen, då hadde me så mange inne som me vil ha. Det hadde fint vore plass til fleire, men det er viktigare å for oss at alle har ei god oppleving her, enn at me skal tena mykje pengar. Og viss det ikkje er burger til alle, toalett nok og frivillige nok, så blir det ikkje kjekt. Å vera frivillig på Festidalen er ein stri tørn, og me skal ikkje tyna dei som hjelper til endå meir enn me allereie gjer, seier Bjørn Olav Tveit etter at festivalen er over.

 

Kritisk på laurdag

Vêret har ein tendens til å spela ei stor rolle for Festidalen. På laurdag truga det med å overta showet fullstendig.

– Arrangørteknisk vart det ein veldig spesiell kveld for oss. Kjenslemessig blei det ein berg-og-dalbane. Silja Sol måtte avbryta på grunn av vêret, det var meldt om auka vind og auka regn. Stemninga var i ferd med å gå ned for alvor, mellom anna fordi vindmålaren på scenen viste farleg høg styrke. Me sat i krisemøte i gamlahuset, og det mest realistiske alternativet var å avlysa, fortel Tveit.

På scenen var det aldeles uråd å vera. Men så tok britiske Dry The River tak, klaska i bordet og proklamerte at dei ikkje reiste herifrå før dei hadde fått opptre. Det resulterte i ein akustisk konsert, der miksebua ad hoc vart gjort om til scene.

Publikum strøymde til, og dei sjarmerande britane leverte ein konsert det vil gå gjetord om i årevis frametter.

– Dei er rett og slett fantastiske artistar. Eg er heilt sikker på at mange har dette som høgdepunktet i år, kommenterer Tveit.

Gutane song seg gjennom regnet, og jammen klarte dei ikkje å tørka det opp òg.

Sol

– Det er grenser for kor lenge me kan halda på publikum, utan at noko skjer. Me var komne dit at bussane var bestilt til klokka 20, og dei stod klare. Så såg me sola koma, og forstod at no snur vêret. Det kom ei og anna tåre hos nokre av oss då.

Tveit er rask med å rosa Bright, som produserer lyd og lys for Festidalen.

– På rekordtid var dei klare med produksjonen og på ein halvtime var jordet fullt og Festidaldyret kunne vakna igjen. Du veit, det er ein standhaftig gjeng dette, både publikum og arrangørar. Og det vart minneverdig, seier Tveit.

Den førebelse oppsummeringa konkluderer med at heile helga var noko av det beste Festidalen har gjort.

– Me handterte uvêret bra, litt tjafs her og der, men alt i alt var dette eit opprykk, reint arrangementsteknisk, sluttar Tveit.

 

Nytt år med overskot

Økonomisk har Festidalen gått bra i 2015.

– Me sit att med eit overskot i år, men ikkje i same storleik som i fjor. Det er betydeleg lågare, av ulike grunnar. Me har hatt ein dyrare produksjon, spesielt på grunn av Lambasleppet og Festifjellet, to arrangement som er komne til i år. I tillegg har me gjort ulike investeringar i år, investeringar som me håpar vil betala seg med tida, forklarer Tveit.

Han legg vekt på at det ikkje er eit poeng å tena mest mogeleg på festivalen, målet er å ha ein tryggleik i økonomien.

– Me vil at fleire og fleire brukar meir tid i Uskedalen denne helga, fordi dette er kvalitet. Me vonar å fylla større hus og at fleire får med seg heilskapsopplevinga Festidalen, som betyr meir enn berre festen på jordet, seier Tveit.