– Det kokar i Stavanger

– Over 13.000 billettar er selde så langt, og stadion blir utselt. Dette blir ellevilt.

Situasjonen før siste serierunde må vera akkurat slik Johnny Furdal håpte på då han signerte for Viking i juli.

– Takk for sist, men du får halda deg heime på søndag, seier midtbaneeleganten, med klar adresse til sist Grenda var i Stavanger og såg Viking-kamp.

Då tapte heimelaget for Tromsdalen. Trass i at Johnny scora etter sju minutt, enda kampen med 4-2-tap og raudt kort til målscoraren. Ikkje spesielt lukkebringande å ha underteikna ringside, altså.

Samling i botn

Men der halve fotball-Norge konkluderte med at Viking berre kunne sjå langt etter opprykk, har blåtrøyene gjennomført ein imponerande snuoperasjon. Laget har slått tilbake med tre strake sigrar, blant anna på bortebane mot Ålesund og Mjøndalen, laga som begge leia tabellen før Viking slo dei. No er det berre ein siger mot Kongsvinger som står mellom Viking og siger i Obos-ligaen.

– Me hadde ei samling i botn etter tapet for Tromsdalen, og både spelarar og trenarar fekk lufta litt forskjellige tankar. Trenaren har høyrt på ein del av innspela våre, spelarane har gått i seg sjølve og alle har tatt tak. Me har brukt meir tid på relasjonar, struktur og taktikk, og me har øvd meir på detaljar, fortel Furdal om forandringa.

For det er ikkje tvil om at det var eit anna Viking-lag som feia Mjøndalen av banen på søndag, enn det laget som vart rundspelt av Tromsdalen fire veker tidlegare.

– Me har hatt litt flaks med resultata til dei andre laga òg, men har no stilt oss i ein veldig bra posisjon etter veldig sterke resultat og prestasjonar, vurderer Johnny.

Furdal noterte seg for sitt 11. mål og 13. målgjevande mot Mjøndalen. Med 24 målpoeng er han på 2. plass på lista over dei nyttigaste spelarane i Obos-ligaen.

God kok

Han stadfestar inntrykket av at det kokar godt i Stavanger om dagen. Så langt er 13.000 billettar selde til kampen, og truleg vert det utselt på Norges fjerde største stadion på sundag.

– Det blir anten helvete eller himmelen. Dette blir ein kamp eg kjem til å hugsa resten av livet, uansett utfall. Me må gå for siger, men det må Kongsvinger også. Dei kan ikkje forsvara seg til ein kvalifiseringsplass, seier Johnny.

Merksemda rundt kampen er enorm. Stavanger-pressa sender liveoverføringar frå treningane til Viking, billettkontoret har utvida opningstidene sine og Johnny sjølv merkar pågangen frå folk rundt han.

– Eg har til og med fått spørsmål frå folk eg ikkje har snakka med på ti år om korleis dei kan skaffa seg gode billettar. Det kokar rett og slett i Stavanger. Flagga heng ute og optimismen er enorm, ler han.

– Kva skjer etter kampen?

– Det bruker eg ikkje ein kalori på. Om spelarar byrja å tenka konsekvens før kampen, så kan det bli mange nervøse karar utpå der. Det er prestasjonen på søndag som er den viktigaste. Uavgjort kan halda, men det blir veldig gøy å vinna, seier Johnny offensivt.

Klokka 13 på søndag skal det avgjerast. Det skal ikkje stå på førebuingane.

– Me møtest på hotell for middag og overnatting, så er det tidleg opp på søndag, slik at me rekk å få i oss to måltid før kampen. Viking får terningkast 6 på profesjonalitet, meiner Johnny.

Då står det berre att å håpa Furdal og Viking leverer til terningkast 6 på banen også på søndag. I så fall blir det opprykk.