Nytt tilbod på kulturskulen

Kulturskulen og eininga for integrering og opplæring samlar folk frå forskjellege nasjonalitetar saman i sitt nye internasjonale kor.

– Det er eit prosjekt vi har stor tru på. Så blir det veldig interessant og sjå kva som skjer vidare. 25 personar møtte opp på fyrste øvinga vår no på måndag, så skal vi ha øvingar kvar einaste måndag framover, seier kulturskulerektor Kirill Zimin.

Det internasjonale koret vert ein del av introduksjonsprogrammet på vaksenopplæringa, men er samstundes eit ope tilbod alle interesserte.

– Då uansett om ein går på vaksenopplæring og kvar ein kjem frå. Dette er eit tilbod for alle, og det handlar om mange forskjellege ting. Det handlar blant anna om integrering, det å få på plass ein samlingsarena for folk frå forskjellege kulturar og land. Og så handlar det mykje om venskap, noko som er viktig for kulturskulen. Vi er ein kulturskule for alle, og alle er velkomen til oss, seier Kirill, som også håpar kvinnheringane vil bli med i koret.

Han fortel at han er veldig glad for at tilbodet no er på plass, eit tilbod som gjev kulturskulen nok ein moglegheit til å spreia kompetansen sin til folket.

– Eg er veldig glad for dette. Det er eit fantastisk tilbod. Og det med kor er jo litt spesielt, men musikk er eit internasjonalt språk som limer folk saman. Så det er veldig flott at vi no har eit sånt tilbod her i Kvinnherad, sluttar rektoren.

Den nytilsette dirigenten i kulturskulen, Dimitrii Kuzmin, er dirigent for det nystarta koret.