Skal fordela 30 millionar

Fram til 15. november er det mogleg for kommunar å søkje midlar til ladepunkt og andre klimasatstiltak. Miljødirektoratet har sett av 30 millionar som dei no ønskjer å gje vekk i siste runde av utdelinga i 2021.

– Klimasatsmidlane går til prosjekt som bidrar til å kutte utslepp av klimagassar og omstilling til lågutsleppssamfunnet, skriv Statsforvaltaren i Vestland i eit nyheitsbrev, og informerer vidare om at midlane vert fordelt av Miljødirektoratet.

Dei seks siste åra har nærare 1500 prosjekt i norske kommunar blitt tildelt midlar. I denne runden er det mogleg å søkje tilskot til følgjande tiltak:

-Meirkostnadar for klimatiltak i konkrete innkjøp

-Tidleg kartlegging av klimatiltak i bygg og anlegg

-Ladepunkt, berre for kommunar som har fått lite, eller inga støtte til dette tidlegare.

Mot netto nullutslepp

Klimasats er ei støtteordning for kommunar og fylkeskommunar som ønskjer å kutte utslepp. Då Kvinnherad har vedteke å vera ein netto nullutsleppskommune innan 2040, er truleg midlane av interesse.

I sist runde var Kvinnherad med, og søkte då om 500.000 kroner til prosjektet «Grøn infrastruktur i Grøn næringspark Kvinnherad». Denne søknaden vart delvis innvilga med 350.000 kroner. I 2019 vart det søkt om 200.000 kroner til «Elsyklar til kommunalt tilsette». Også her fekk kommunen midlar.

Prosjektet «Landstraumsanlegg for yacht- segmentet i Rosendal» fekk derimot avslag. Målsetjinga med dette prosjektet, som hadde ein søkesum på 1.588.000,- var å «byggje eit pilotanlegg for å tilby landstraum til desse skipa. Med det kan vi auke tida ved kai, redusere utsleppa, og tilby nye reiselivsprodukt til dette segmentet.»