Har utvida frisbeegolfbanen

For to veker sidan vart tre nye hol avduka på frisbeegolfbanen på Hatlestrand. Med det har frisbee-entusiastane fått nye utfordringar å bryna seg på.

– Me har utvida frå seks til ni hol. Dei seks fyrste er veldig enkle og du finn dei inne på skuleområdet, medan dei tre siste er plassert litt oppe i skogen og er med det hakket meir utfordrande, seier Terje Aksnes Øystese.

Banen er mykje i bruk, både av lokale frisbeegolfentusiaster og tilreisande byfolk.

– Det er ein god del som nyttar seg av tilbodet. Faktisk er det ein del som spelar i byn og som kjem her i frå som er ivrige, seier Terje.

Dei jobbar med å få på plass to utkast for kvart hol, sånn at dei til slutt kan tilby spelarane ein fullverdig 18-hols bane. I tillegg har dei planar om å arrangera turnering i månadsskiftet april-mai.

– Me har hatt litt kontakt med dei som spelar i Bergen for å høyra om dei har lyst å koma, for me ynskjer å få arrangert ei skikkeleg turnering. Me prøver å få til ei helg som passar for flest mogleg, men me er ikkje heilt i mål enno, sluttar Terje.