Reis som dei lokale

No kan ein kjøpa «Travel like the locals»-turar i Hordaland, der tre av turane har avgang frå Rosendal.

– Viss ein ikkje berre vil reise frå A til å, men ønsker ein rundtur eller ein tur som ikkje går rakaste veg, er det ikkje så lett å finne ut korleis ein gjer det med offentleg transport – spesielt ikkje om ein er turist i området. Konseptet er «ferdigpakka» turar med offentleg transport som inneber spanande reiser til fine destinasjonar, heiter det i ei pressemelding.

Turane kan kjøpast på førehand på nett eller på fysiske utsalsstadar.

 

Bilfri utforsking

Møre og Romsdal utvikla konseptet «Reis som dei lokale» i 2016, og i år er tilbodet utvida til Sogn og Fjordane, Rogaland og Hordaland. Tre av turane, der ein reiser med høvesvis buss, ferje og båt, startar frå Rosendal: Folgefonnhalvøya rundt, Øyhopping i ytre Hardangerfjord og Historiske Halsnøy og Skånevik. Informasjon om dei ulike rundturane finn ein enkelt inne på nettsida tltl.no.

– Ein nyttar eksisterande ruter, som er sydd saman på ein slik måte at ein får utforska fine områder av regionen utan at ein treng bil. Samstundes får ein utnytta tomme seter på buss og båt no i sesongen. Det er også lagt inn pausar slik at ein får tid til eit museumsbesøk, ein lunsj eller handling i lokale butikkar, informerer Margit Lund-Mikkelson på turistkontoret.