Fleire smittetilfelle førre veke – to av dei er omikron

Det vart registrert 26 koronatilfelle i Kvinnherad i løpet av årets siste veke. Stikkprøvar viser at to av desse er omikron.

Måndag morgon offentleggjorde Kvinnherad kommune smittetala for årets siste veke. Dei viser at det er registrert så mange som 26 smittetilfelle sidan førre måndag.

– Det er litt mykje, det er det. Ein del av desse er knytt til sosiale lag eller fleire sosiale lag i ytre luten. Så det er nok snakk om eit utbrot, ja, seier kommuneoverlege Glenn André Opland, som fryktar at smitten kan auka framover.

– Ja, eg trur det kjem til å bli meir no, det gjer eg, seier kommuneoverlegen.

Av dei siste tilfella har det blitt påvist to omikronvariantar.

– Det er stadfesta to omikron etter stikkprøvar, så det kan vera meir, seier han.

Dei 26 påviste tilfella har sett 55 kvinnheringar i isolasjon eller karantene som husstandsmedlem.

– Så er det fleire nærkontaktar i karantene, men kor mange det er veit vi ikkje, seier han.