Mjauande lesestund med Erstad

Veronika Erstad opna den mjauande familiedagen i biblioteket med høgtlesing frå boka si «Kattejenta» laurdag føremiddag.

Omringa av 40 oppslukte barn og deira føresette sat barnebokforfattar Veronika Erstad ikledd katteøyre og las høgt frå boka si «Kattejenta». Boka tek føre seg forteljinga om Ruth som saman med katten hennar August held på med eit hemmeleg oppdrag i juleferien, og som ikkje er noko interessert i å bli forstyrra i arbeidet. Verken av pappa som overraska med ferietur til Lanzarote, eller av venninna og hundejenta Kristin som hadde veldig lyst til å leika med Ruth.

Fint lest av forfattaren sjølv fanga forteljinga alle dei frammøtte, anten dei var kledd ut som kattar eller kom i sivil. Ungane sat musestille og konsentrert rundt om på golvet for å få med seg heile historia om juleferien til kattejenta Ruth og katten August. Blant dei brørne Kristoffer Bakke (8) og Simen Brekke (5). Dei hadde teke turen frå Åkra saman med besteforeldra Peder og Sunniva Brekke, alle staseleg kledd opp i kostymer frå eventyret om «Katten med støvlene». Kristoffer som Pusemeister Vlar, Simen som Tigergutt, bestefar som Skipskatten og bestemor som Huskatten. Dei sat alle stor pris på boka til Veronika Erstad.

– Boka var kjempespennande. Det var veldig kjekt å høyra kva Ruth og katten hennar fant på i juleferien, seier Kristoffer Bakke, som saman med vetlebror Simen gledde seg veldig minimusikalen «Mjau» som avslutta familiedagen i biblioteket.