Fleire reiste frå Stord lufthamn i fjor
Stord lufthamn kan sjå tilbake på eit godt 2021 samanlikna med året før.
Sjølv om koronapandemien framleis set sitt preg på talet flypassasjerar på Stord lufthamn, gav fjoråret ein solid vekst for flyplassen på Stord.
– I 2021 reiste 17.279 personar med fly over Stord lufthamn. Samanlikna med 2020 utgjer dette ein auke på 1.138 reisande eller 7,05 prosent, skriv Stord lufthamn på si nettside.
Artikkelen held fram under annonsen.
I tillegg til det gav 2021 ein auke på heile 39,37 prosent i talet landingar og avgangar.
– U 2021 registrerte lufttrafikktenesta 5.072 flyrørsler (landingar og avgangar). Samanlikna med 2020 utgjer dette ein auke på 1.433 flyrørsler, melder lufthamna.
Det klart mest nytta tilbodet frå flyplassen på Stord er Stordflyet si Oslo-rute. Eit tilbod 15.431 personar nytta seg av i 2021. Det er 2.938 fleire reisande enn i 2020, noko som tilsvara ein auke på 23,52 prosent.
– Stordflyet flyg for tida eit redusert flyprogram på Osloruta. Lufthamnselskapet ventar no i spenninga på om staten vil innlemma Osloruta i sine framtidige flyrutekjøp og såleis lysa ruta ut på eit nytt anbod, skriv Stord lufthamn.