Ute med sin første singel
Kjerstin Guddal Jansson (19) debuterer på musikkhimmelen med si eigenproduserte låt, «Paper Plane».
– Den er skrive slik at den fortel ikkje om noko direkte, eg sit på mi tolking og mitt forhold til den. Så kan andre tolka den på sin måte, ut i frå kva kjensler dei ber på eller kva assosiasjonar dei får når dei høyrer den, seier 19-åringen frå Seimsfoss.
Artikkelen held fram under annonsen.
Kjerstin har både skrive og produsert songen som vart tilgjengeleg hos alle dei store strøymingstenestene 22. februar.
– Eg skreiv «Paper Plane» sommaren 2017. Og då eg byrja på musikkproduksjonslinja på Solborg Folkehøgskule så lærte eg meg prosessen med å laga og produsera musikk. Så til slutt sat eg der med ei ferdig låt, etter fleire månadar med mykje arbeid, seier Jansson.
Ho fortel òg at ho fekk hjelp av lærar Kjell Andreas Westby i sluttfasen før songen skulle ut. Det for å få ein annan innfallsvinkel og for å få siste touch på plass.
«Paper Plane» er ikkje det siste vi har høyrt frå Kjerstin, som heile vegen arbeidar med ny musikk. Men kva tid den neste låta kjem, det veit ho ikkje enno.
– Eg har skrive fleire songar som eg ynskjer å få ferdige før skuleåret er slutt. Men om eg blir så nøgd at det kjem ut på strøymingstenestene med det fyrste, det må vi nesten berre sjå litt an, seier Jansson.