To dødsulukker på ei helg

To menn omkom i Kvinnherad denne helga; ein i fallulukke i Rosendalsalpane, ein drukna i Fjelbergsundet.

Fredag ettermiddag fall den 53 år gamle Eirik Christian Æsøy frå Homborsund utanfor Grimstad ned 150 meter og døydde. Sundag morgon vart 65 år gamle Sigve Andreas Fjelberg funnen drukna i Fjelbergsundet.

– Det er to tragiske ulukker, kommenterer lensmann Jan Fosse ved Kvinnherad lensmannskontor.

 

Fallulukka

Fredag var eit følgje på 11 på tur i fjellområdet Bjørndalstindane ved Rosendal, i regi av DNT Sør si fjellsportgruppe. I 16-tida skal mannen ha falle eller sklidd 150 meter nedover fjellsida og omkome som følgje av fallet.

– Hordaland politikammer fekk melding om fallet først klokka 20.14, fordi turfølgjet var utanfor mobildekning på ulukkestidspunktet, opplyser Fosse.

Turfølgjet vart møtt av politiet då dei kom ned i Hattebergsdalen. Dei vart deretter innkvartert på Rosendal Fjordhotel og tatt vare på av det kommunale kriseteamet.

Den omkomne vart først forsøkt henta ut på laurdag, men vêret tillét ikkje det.

– Fallet skjedde i eit område som var for langt unna og for lite tilgjengeleg til at ein kunne senda inn bakkemannskapar. Luftambulanse prøvde å henta mannen på laurdag, men lukkast ikkje. Me vurderte det slik at eit Sea King-helikopter skulle prøva å henda den forulukka ut på sundag føremiddag. Det var vanskeleg for dei også, men dei fann ei opning i skydekket som gjorde det mogeleg. Den omkomne vart sendt rett til Bergen for obduksjon, seier Fosse.

Turfølgjet vert av lensmannen skildra som fjellvante og godt utstyrte. Ulukka skal ikkje ha skjedd inne i den spektakulære og farlege Bjørndalstraversen, men i eit område nærare Juklavasskruna og Store Bjørndalstind.

 

Drukningsulukka

Sundag morgon klokka 07.10 vart politiet varsla om at ein mann var funnen drukna i Fjelbergsundet.

– Dei som fann han forsøkte å gjenoppliva han, men dei lukkast ikkje. Me veit at han var på fest i eit naust på Fjelbergøy, og at han skulle over til Borgundøy på natta. Båtturen var på 5-700 meter, opplyser lensmannen.

Den ca. 15 fot opne båten var funnen med påhengsmotoren dregen opp.

– Mannen har kome fram til der han skulle og så har han falle i sjøen. Det er ikkje mistanke om noko kriminelt, men den døde er sendt til obduksjon for å finna ut om det kan vera eit illebefinnande som er årsaka til fallet, legg Fosse til.

Sindre Andreas Fjelberg hadde bustadadresse på Sæbøvik, men var opphavleg frå Fjelbergøyane. Han skal i følgje Bladet Sunnhordland ha blitt funne med redningsvesten på.