Lyser ut midlar til å trygga skulevegar og nærmiljø for 2023

Statens vegvesen har no invitert alle kommunar til å søke tilskot for neste års trafikktryggleiks-tiltak.

I Barnas Transportplan i Nasjonal transportplan 20222-2033 (Meld. St. 20, 2020-2021) er det lagt til grunn ei satsing på auka trafikktryggleik for barn og unge i perioden 2022-2027.

Tilskotsordninga som skal gi tryggare skulevegar og nærmiljø er sentral i denne satsinga, som starta i 2022.

Regjeringa sitt mål er at fleire barn skal sykla eller gå til skulen.

Tiltaka som kan få tilskot skal følgja visse kriterium, mellom anna desse:

– Tiltaka skal vera langs skuleveg eller nærmiljø der barn og unge ferdast.

– Tiltaket kan vera både på kommunal veg og fylkesveg.

– Initiativ om tilskot til tiltak på fylkesvegnettet må koma frå kommunane og det må ligga føre ein avtale med fylkeskommunen (vegeigar) at tiltaket er avklart og godkjent som tiltak.

Døme på tiltak som kan få midlar frå satsinga er sykkelparkering, tiltak som aukar tryggleiken rundt holdeplass for skulebuss, etablering av drop-soner, skilting og oppmerking av hjartesoner og belysning kor mjuke trafikantar kryssar vegen.

Fristen for å søka tilskot er 15. oktober.