Ambulansebåten deltok i redningsaksjon ved Lukksund

To turistar opplevde i natt at båten deira tok inn vatn. Ambulansebåten frå Kvinnherad deltok i redningsaksjonen.

Klokka 03.55 natt til søndag vart politiet kontakta av to 23 år gamle danske turistar som ferierte på Tysnes.

«To personar fekk problem i samband med at båten tok inn vatn. Dei fekk tatt seg inn til land, men visste ikkje kvar dei var. Ambulansebåt fekk etterkvart lokalisert og hjelpt mennene som var nord for Lukksundet», skriv Vest politidistrikt på Twitter.

Bergens Tidende utdjupar at mennene hadde ein liten, lånt båt, som fekk problem med påhengsmotoren.

– Dei var litt vanskelege å forstå, men meldte at dei var ute i ein båt som tok inn vatn, Ganske kjapt etterpå klarte mennene å koma seg til land, men dei visste ikkje kvar dei var. Vi brukte ein del tid på å lokalisera dei, fortel operasjonsleiar Tom Johannessen ved Vest politidistrikt til BT.

Hovudredningssentralen for Sør-Norge og ambulansebåtar frå Austevoll og Sunde vart kopla inn i aksjonen. Karane vart til slutt lokaliserte etter at dei sjekka GPS-en på telefonen deira, og klokka 05.12 vart dei henta av ambulansebåten frå Austevoll.