Vil du bli ein av Hydro Husnes sine 90 nye tilsette?

Då må du vera rask i vendinga, for søndag går nemleg fristen for å søka på ein av dei 90 nye stillingane ved verket ut.

– Vi skal oppgradera verket med ny teknologi og dobla aluminiumsproduksjonen. Ut i frå den basisbemanninga vi har hatt så skal vi opp ein stad mellom 90 og 110 årsverk. Dei som vil vera med må løpa og søka, seier fabrikksjef Johan Berg ved Hydro Husnes.

 

Dobla produksjonen

Hydro sentralt investerer 1,4 milliardar kroner for å opna og oppgradera B-hallen på Husnes med nye teknologielement frå piloten deira på Karmøy. Produksjonen av aluminium skal gå frå dagen 95.000 tonn til 190.000 tonn årleg. Og når B-hallen skal stå klar i løpet av første halvår 2020, hastar det med å få på plass folk.

– Rekrutteringsprosessen er i gang og fyrstkomande søndag er søknadsfristen for 90 stillingar. Vi har eit betydeleg behov for å få inn dyktige folk, så vi håpar at dei som ynskjer vil søkja før fristen går ut, seier Berg til Grenda.

Dei har blant anna eit behov for folk med kompetanse som prosessoperatørar, elektrikarar og mekanikarar.

– Vi treng fleire nye, dyktige operatørar til å drifta våre prosessar, og også mekanikarar, automatikarar, elektrikarar og ingeniørar. Eg meiner at det gode samarbeidet mellom tillitsvalte og leiinga har bidrege til å gjera Hydro Husnes til ein trygg og god arbeidsplass. No må interesserte søkjarar gripa moglegheita. Vi ser fram til å få mange nye kollegaer, seier hovudtillitsvalt Ørjan Normann i ei pressemelding.

 

Moglegheiter

Nye kollegaer ser også den nyetablerte gruppa for tilsette under 35 år, Hydro Young Professionals, fram til å få.

– Eg starta sjølv som lærling her i 2011, og no er eg avløysar for områdeleiaren. Moglegheitene er mange om ein står på, og med blant anna HYP er det enkelt å byggja nettverk. Eg trur våre nye kollegaer kjem til å trivst her, seier leiar Madelen Ølmheim i HYP i ei pressemelding.