– Dyrare for næringslivet, men bra for Kvinnherad
Det er konklusjonen Jørn Hjelmeland trekkjer etter at Kvinnheradpakken vart formelt velsigna på torsdag.
Gjennom transportselskapet Johannes A. Hjelmeland AS er Jørn Hjelmeland blant dei som kjem til å vera med og betala for utbetringane som no skal gjerast på Kvinnheradvegane. Det kjem til å merkast, slår han fast.
– I dei tilfella der me konkurrerer om oppdrag ut av kommunen, kan me ikkje belasta kundane for ekstrakostnadane. Der er det vår forteneste bompengane tar. I motsette tilfelle, må me belasta kundane for bompengane, og då blir det ein ekstra kostnad for dei. I det lange løpet er dette med på å gje næringslivet lokalt dårlegare konkurransevilkår, seier Jørn Hjelmeland.
Artikkelen held fram under annonsen.
Må vera bank
– I dag har me 50 prosent rabatt på ferjene, så lenge me kjøper ferjekort. For oss betyr det at me fyller opp kortet med 25.000 kroner på kvar av bilane våre, og me blir på mange måtar bank når me betaler så mykje på førehand. Det kjem ei endring på ferjene, og det kjem til å gje oss mindre rabatt enn me har i dag. Sjølv om me må vera bank, blir sjølve rabatten ein fordel for oss, for me kan bruka han aktivt overfor kunden, forklarer han.
Totalt sett betyr dette større kostnader for dei. Å fylla opp ferjekort og autopassbrikke til kvar av fem store bilar, knyter opp fleire hundre tusen i slengen.
– Det at me må halda større summar i ferjekort og autopassbrikkar, går utover likviditeten vår, påpeikar Hjelmeland.
Positivt
Transportbedrifta har 70 prosent av oppdraga sine ut av Kvinnherad, og ser at Kvinnherad ikkje blir einaste plassen med eigen pakke.
– Dette er likt alle plassar. Kvam, Bømlo, Haugesund, alle gjer det slik. Og i avveginga mellom dei negative effektane for oss og dei positive effektane som vegopprustinga vil gje Kvinnherad, endar eg likevel på å gje tommelen opp. Det er dette som må til for at me skal få utbetra vegane våre. Og det er brukarane av vegen som tar rekninga, oppsummerer han.
Artikkelen held fram under annonsen.
Betre vegar er han sikker på vil vera til fordel for både privatpersonar og næringslivet i Kvinnherad.
– Ser du på strekninga Folgefonntunnelen - Utåker, så har det vore gjort meir arbeid på postvegane der dei siste 40 åra, enn på hovudvegane. Så det er på tide me får utbetra her, sluttar han.