– Hastar med ny ferjekai

Torgils Våge meiner problema med ferjeavgangane frå Varaldsøy dei siste dagane viser at det hastar med å byggja ny ferjekai på Skjelnesodden.

Uvêret på fredag vart følgd opp av tekniske problem både laurdag, søndag og måndag. Ifølgje Varaldsøy-innbyggjar og Sp-politikar Torgils Våge var øya heilt utan ferjesamband frå laurdag kveld til klokka 16.25 på søndag, altså nesten eitt døger. Han registrerte at i denne perioden låg reserveferja «Solskjel» til kai på Sunde, og undrar kvifor ikkje ho vart sett inn i ruta tidlegare.

– Det går ikkje an. Dette kan umogleg vera i samsvar med krava til beredskap ifølgje konsesjonen. Denne saka må ordføraren ta opp med Skyss, som igjen må ta det opp med Fjord1, seier Torgils Våge til Grenda.

Problema kunne fått store konsekvensar for dei lokale bøndene.

– Ein bonde her på øya hadde avtale med mjølkebilen klokka 07.20 søndag morgon, men den kom seg jo ikkje over. I staden kom bilen i 21-tida om kvelden, og det var i siste liten før mjølka måtte kastast. Og måndag morgon kom elevane for seint til skulen på grunn av nye tekniske problem, fortel Våge.

Gjer så godt dei kan

Fast ferje i ruta Årsnes-Varaldsøy-Gjermundshamn er MF «Lærdal», ei ferje som er berykta for å ikkje tola vind og bølgjer særleg godt.

– «Lærdal» held ikkje mål i dårleg vêr. På NRK Hordaland var det ein på fredag som vart sitert på at han hadde reist til sjøs i mange år, men aldri hadde opplevd det verre enn då han reiste med «Lærdal», opplyser Våge.

Han understrekar at kritikken ikkje er retta mot mannskapet, for dei gjer så godt dei kan. Derimot ynskjer han seg betre ferjemateriell, og ikkje minst ny ferjekai.

– Det hastar enormt med ny ferjekai på Skjelnesodden, slår Torgils Våge fast.

Ordførar Hilde Enstad (Ap) seier det på ingen måte er akseptabelt at Varaldsøy vart så lenge utan ferjekontakt med omverda.

– Eg òg får desse SMS-ane frå reiarlaga når det er endringar i tilbodet, og stussa over alle meldingane som kom i helga, sjølv om nokon av dei skuldast vêret. Det er regulert i kontrakten kva som skal gjerast viss ferja er ute av drift i eit visst tidsrom, og vi forventar at Skyss følgjer opp dette, seier ho.