Bånn gass for å få Bunnpris-lokalet klart

Gler seg stort til å få tredobla arealet til butikken.

– Dette blir stor stas. Me har vore vane med å jobba i tronge lokale i nokre år i dei tre åra eg har vore ved Bunnpris. Det blir veldig deilig å få nytt, stort lokale, plass til varene me har og plass til å visa dei fram, samt langt enklare system for oss til å varehandtering. Det blir rett og slett noko anna enn det me hadde, seier Carl Bruno Bodin, som blir dagleg leiar for Bunnpris på Seimsfoss framover.

Nytt konsept

Då Grenda var innom Bunnpris onsdag føremiddag, var det full aktivitet i det 650 kvadratmeter store butikklokalet. Raymond Johansen frå regionskontoret i Bergen og avtroppande butikksjef Berge var blant dei som var fullt fokuserte om å få det nye butikklokalet klart til opninga 12. januar.

– Me opnar alltid på ein torsdag. Det er fast for Bunnpris, smiler Johansen.

Lokalet blir innreia som ein modulbutikk, som er eit nytt konsept hos Bunnpris-kjeda.

– Dette er ein slags testrunde, med den nyaste oppsettet til kjeda, forklarer Raymond Johansen.

Butikken på Husnes vart bygd før det konseptet starta, og dermed blir ikkje dei to butikkane heilt like.

– Dei har ikkje same utsjånaden som her. Her er det endå meir gjennomført visuelt, noko som skal vera med på å gjera det lettare for kundane å finna varene dei er på jakt etter. Me får eit lokale som er bygd for å vara i mange år framover, med nytt utstyr, inkludert straumeffektiviserande utstyr, legg Johansen til.

Enkelt val

Både Seimsfoss- og Husnes-butikken til Bunnpris har vore drivne av Andreas Berge som franchisetakar. Han trekkjer seg no ut av drifta av butikken på Seimsfoss.

– Eg har ikkje tid til begge. Det er ikkje nok timar i døgeret til å driva to butikkar, spesielt etter at eg har fått ei dotter. Eg skal konsentrera meg om butikken på Husnes framover, fortel han.

Berge overtok som butikksjef på Seimsfoss i 2019, og fekk også ansvaret for den nye butikken på Husnes då den opna sommaren 2021.

– Det var ein litt rotete start på Husnes, då det er krevjande å starta opp ein ny butikk, men det har gått seg til. Det blir ein fordel for Carl Bruno her, som har ein erfaren gjeng med seg når butikken flyttar på seg, vurderer Berge.

– Butikken her skal drivast av som ein filial av Husnes i 3-4 månader, med Bodin som dagleg leiar, og så skal me få på plass ein franchisetakarar etter det, fortel Johansen.

– Var det vanskeleg å bestemma seg for å flytta?

– Om eg skal vera heilt ærleg, så var det enkelt. Enten flytta me inn hit, eller så hadde det kome ei anna kjede inn her. Fire daglegvareforretningar i Rosendal/Seimsfoss-området hadde vore for mange. Tre butikkar går, analyserer Johansen.

Der Bunnpris på Husnes har søndagsope, blir ikkje lik ordning sett på som nødvendig i dette lokalet, sidan turiststatusen til området tillét heile butikken å vera open om lag halve året.

– Kundane her på Seim er lojale og passar på oss. Dei fortener ein betre butikk, og det er me glade for at me kan gje dei no, sluttar Bodin.