40-årsfest med premiedryss

Då Kvinnherad Fotoklubb opna jubileumsutstillinga fredag kveld, vart dei helsa med eit premiedryss frå Norsk Selskap for Fotografi.

Kvinnherad Fotoklubb vart starta den 20. februar 1983, altså for 40 år sidan. Initiativtakarar var Atle Helland og Geir Remme.

– Eit halvt år tidlegare starta vi Valen Fotoklubb. Men plutseleg fekk vi medlemmer frå heile Kvinnherad, og i tillegg var det lettare å søkja om tilskot viss vi dekka heile kommunen. Så difor skifta vi namn, opplyste Helland då klubben markerte jubileet med å opna ei utstilling på Husnes Storsenter.

Dei har no 23 medlemmer. Utstillinga syner fram 32 bilete, for også nokre tidlegare medlemmer er med. Lokalet med fotografia står ope, så alle kan gå inn og kikka ut neste veke.

– Dei fyrste åra hadde vi medlemsmøta sporadisk heime hjå kvarandre. Mykje gjekk i svart/kvitt, og mange av medlemmene hadde eigne mørkerom. Det har vore ei revolusjonerande utvikling på desse 40 åra. Før måtte vi gå i Posten og levera inn ljosbilete, og så venta 14 dagar i spenning på om resultatet vart bra, mimra Helland.

Sandvasshorga Blues

Etter kvart fekk klubben samlingsplass i samfunnshuset på Husnes, der dei var fram til kring år 2000. Så vart det ti år på biblioteket, før klubben etablerte seg i Aksen, der dei framleis held til.

– Vi har møte kvar 14. dag. Folk er hjarteleg velkomne til å stikka innom, oppmoda Atle Helland.

Etter at Sigve Solheim hadde framført «Sandvasshorga Blues», ein vakker song om favorittfjellet hans, fekk Roald Synnevåg ordet. Han er tidlegare leiar og noverande sekretær i Norsk Selskap for Fotografi.

– Dei er utruleg flinke her. Høgt nivå, slo han fast, og viste mellom anna til at Atle Helland har blitt norsk meister tre gonger; i 1996, 2003 og 2011.

– Han har vore god både i den digitale Verda og i den analoge. Det står det veldig respekt av, vurderte Synnevåg.

Hoggorm og marihøne

Deretter delte han sjenerøst ut gullmedaljar, sølvmedaljar, diplom og vimplar. Heldige mottakarar var Atle Helland, Lars Martin Teigen, John Asle E. Hansen og Ole Berntsen. Den største premien gjekk til Helland. Han har nemleg stått for ein prestasjon som ingen andre i NSFF si 96 år lange historie har klart; å skaffa seg 900 nasjonale konkurransepoeng.

Helland vart også heidra som vinnar av Vestkysten Fotokamp, med eit bilete av ein gapande hoggorm og ei marihøne i bakgrunnen.

– Biletet vart teke på hytta i Rollag i fjor sommar. Men det var med livet som innsats. Eg låg på alle fire, kanskje 60 centimeter frå ormen, medan Anita passa på at eg ikkje vart angripen, sa vinnaren til Grenda.

Etterpå fortsette festen med kake og føredrag i klubblokalet.