– Det er ikkje lurt å plassera ei bedrift som driv med sveising på sida av eit drivstofflager

Lyst å starta veka med ein dose galleriglyttar frå kommunestyret? Her er eit godt utval.

– Gode kommunestyre, godt å sjå dåke! Det følest som det har runne mykje vatn i havet sidan sist vi møttest.

Ordførar Hilde Enstad (Ap) viste til at det har skjedd mykje sidan politikarane førre gong var samla før jul.

– Eg skal ikkje leggja meg opp i rekkefølgja, men Ove Lemicka var oppe med handa nokre sekund føre meg.

Thorleif J. Hellesøy (Frp) takka nei til å få ordet fyrst.

– Eg har vore bortreist nokre veker, men eg har følgd med i avisene, og ser de har hatt det travelt.

Ove Lemicka (Frp) konstaterte at det har vore litt «action» i Kvinnherad-politikken.

– Korleis kan ein gjera ein interpellasjon om til eit spørsmål? Eg klarar ikkje sjå det.

Øyvind Hardeland (Ap) likte ikkje at han ikkje fekk fremja ein interpellasjon om poll til poll-tunnelen.

– Vi skal ikkje ha nokon debatt om dette.

Hilde Enstad la opp reglane oss reglane for interpellasjon, og sette med det punktum.

– I fotballen har vi VAR. Der kan det blir overdømming etter at ei avgjersle er teken. Men her er kampen avlyst.

Knut Johannes Helvik (H) let seg inspirera av fotballreglane til å forklara staten sitt trekk i rammetilskotet.

– Ein oppfører seg nærast som sheriffen av Nottingham og forfordeler staten.

Ove Lemicka (Frp) henta sin illustrasjon frå soga om Robin Hood.

– Vi må kjempa så lenge det renn blod gjennom oss, er det ikkje det dei syng?

Gunnar Våge (Sp) hadde på si side Wenche Myhre i tankane.

– Dette kjem til å henga over oss i heile 2023 og utover det også.

Synnøve Solbakken (Ap) fryktar at debatten om trekk i rammetilskotet ikkje er over med det fyrste.

– Eg er skuffa over eiga regjering.

Øyvind Hardeland (Ap) tykkjer regjeringa har lete marknaden styra når det gjeld straumprisane.

– Unnskyld, ordførar, kan eg bruka ordet «prylt»?

Det viste det seg at Hardeland både kunne og gjorde.

– Regjeringa sin framgangsmåte er under ein kvar kritikk.

Heller ikkje Gaute Lund (SF) sparte på krutet om rammetilskottrekket.

– Eg får vel smella til mot regjeringa, eg òg.

Øyvind Lernes (H) tykte det var forventa at han skulle følgja opp kritikken.

– Eg håpar dei ikkje brukar pengar på ein rapport som seier at vi ikkje treng brannstasjonar der politikarane har sagt at vi skal ha brannstasjonar.

Jostein Saghaug (MDG) er ikkje trygg på at vedtaket om brannstasjonsstruktur vert gjennomført.

– Trio har venta lenge, medan banen i Rosendal rett og slett er helsefarleg, den kan ikkje brukast.

Gunnar Våge forklarte kvifor Sp, Ap og H ville behalda midlane til kunstgrasbanane.

– Gaute Lund, kan eg få litt teknisk bistand med ein PC her?

Hilde Enstad visste kven ho skulle spørja då ho fekk dataproblem.

– Eg støttar utbygging av småkraft der det ikkje har store konsekvensar for naturen og miljøet, men eg synst ikkje vi skal opna for omkamp der det ikkje vart gjeve konsesjon.

Marit Årthun (KrF) slo eit slag for å sikra verna vassdrag.

– Viss vi seier nei til vindkraft, så skal ikkje Statsforvaltaren kunna overprøva det.

Gaute Lund ynskjer derimot at Statsforvaltaren skal kunna gripa inn viss Kvinnherad seier ja til vindkraft.

– Måten å tolka demokratiet på av føregåande talar var noko spesiell. Eg tenkjer at i eit demokrati så er det fleirtalet som bestemmer.

Ove Lemicka med førelesing i statsvitskap til Gaute Lund.

– Naturverdiane her er så store at vi ikkje vil at eit tilfeldig fleirtal i kommunestyret skal kunna skalta og valta som dei vil.

Gaute Lund med kontraåtak.

– Det er fyrste gong eg står her, så eg har med meg hugselapp.

Kristian Bondhus-Jensen (Sp) hadde skrive ned stikkord til talen sin.

– Eg har på meg FN-pinsen om FN sine berekraftsmål i anledning dette innlegget.

Øyvind Utne (H) stilte med nøye utvald pynt.

– Dette er kompliserte saker.

Leif Sverre Enes (H) slo fast at store kraftutbyggingsprosjekt er for vidarekomne.

– Dette er i alle fall ei sak der vi har samanfallande interesser med Ullensvang på dette kommunestyremøtet.

Gaute Lund rekna med det var full semje om Statkraft sine planar i Mauranger.

– Vi har eit forslag til uttale på norsk og eit forslag frå LVK på polardansk.

Lund med eigen karakteristikk av det som einskilde andre omtalar som bokmål.

– Då skal eg prøva noko eg ikkje har gjort før; å ta det utan manus.

Stein Olav Ølvestveit (Sp) drista seg på talarstolen utan ferdig tekst.

– Du klarar deg fint utan manus.

Ordførar Hilde Enstad roste Ølvestveit etter innlegget hans.

– Alle er vel samde med meg at det ikkje er lurt å plassera ei bedrift som driv med sveising på sida av eit drivstofflager.

Matthias Zimmermann (MDG) med spenstig biletlegging av problemet på Børneset.

– Eg er ein habil familiebadar

Silvia Tofte (H) avslørte at ho likar å gå i bassenget.

– Eg venta i lengste laget, for eg tenkte at dei klimapartia som er her ville ha ordet fyrst.

Clara Hveem (Sp) var i det sjenerøse hjørna.

– Heldigvis skriv Marit fint, så eg skal lesa opp det ho har skrive.

Alf Jarle Langeland (KrF) tok på seg å framføra eit spørsmål på vegner av partikollega Marit Årthun.