Vurderer konkrete areal til bustadtomter

Administrasjonen er i ferd med å følgja opp politikarane sitt ynske om å kjøpa inn bustadareal i einskilde bygder.

I budsjettvedtaket frå desember står det eit punkt om at «Kommunen skal omgåande gå i gang med å kjøpa inn bustadareal i bygder der det manglar tilgjengeleg areal og der det er stor etterspørsel etter bustadar». Fristen for å gje formannskapet ein statusrapport vart sett til mars, og difor tok fungerande kommunedirektør Gunn Berit Sandnes Fosse saka opp torsdag ettermiddag.

– Status er at arbeidet har starta opp. Det er sett av 5 millionar kroner årleg dei neste åra, og kommunedirektør er oppteken av å få på plass eit best mogleg grunnlag for arbeidet før sjølve prosessen med kjøp startar, sa ho.

Kommunestyret vedtok også eit punkt om avhending av kommunale eigedomar.

– Det er naturleg å sjå desse to sakene i samanheng. Det er difor lagt til rette for eit samarbeid på tvers av fleire sektorar for å sikra synergieffekt, vurderte Fosse.

Kan verta løyste

Ho opplyste vidare at det no er kartlagt og vurdert konkrete areal som kan vera aktuelle å tilrå for kjøp og vidareutvikling. Men denne prosessen må til ein viss grad sjåast i samanheng med den komande arealplanen. Kommunedirektøren rår også til at private byggefelt som er planlagde, men som av ulike grunnar ikkje har fått godkjent reguleringsplan, må takast med i vurderinga.

– Parallelt med utgreiing av denne saka, er det von om at enkelte slike saker kan verta løyste, og dermed bidra til målsetjinga om tilgjengeleg bustadareal, sa Fosse, som varsla at det vil koma ei politisk sak om framdrifta til formannskapet i april.