– Det er heilt normalt å ha ein dårleg dag

Måndag føremiddag markerte skulehelsetenesta verdsdagen for psykisk helse på fleire skular kringom Kvinnherad, blant anna på ungdomsskulen i Rosendal.

Fyrste gong verdsdagen for psykisk helse vart markert på noko vis var i fjor. I år fokuserer kampanjen på det å høyra til og vera i lag, gjennom emmneknaggen #lagplass.

Sjukleggjering

– I skulehelsetenesta jobbar me veldig mykje med psykisk helse. Noko eg ofte seier til elevane er at dei aller fleste av oss har hatt skrubbsår på knea då me var små, og då lærte me også at det forsvann. Men me har kanskje ikkje lært at kjensler også kjem og går, sa helsesjukepleiar Monica Tofte.

Helsesjukepleiarane ynskjer gjennom denne kampanjen å normalisera tankar, kjensler og reaksjonar som er heilt normale.

– Det er normalt at livet svingar og det er normalt å ha ein dårleg dag. Me ser at det gjerne har blitt ein tendens til å sjukleggjera ting som faktisk er heilt normalt. Difor ynskjer me å ha eit friskt fokus på det å vera god med seg sjølv og vera ven med seg sjølv slik som ein er mot andre, fortalde helsesjukepleiar Anette Huse.

Som ein del av markeringa skulle skuleelevane gjennom ei løype med fire ulike postar som alle fokuserte på ulike følelsar, tankar og diverse verktøy ein kan bruka når ein opplever vanskelege og vonde følelser.