Vellukka julemarknad

Tradisjonen tru var det ein stappfull marknad under Jul i Rosendal i år.

Heile dagen var parkeringskjellaren under Eurospar Rosendal full i folk som myldra rundt og såg i bodane. Her kunne ein få kjøpa seg alt ifrå Sundepølsa eller «stroopwafel» til julekuler og barbieklede.

37 utstillarar laga julestemning i det kalde vêret, og både Rosendal songlag og B-gjengen i Rosendal Musikklag spela flott musikk for dei frammøtte.

Nett og kuler

Dana Valerica Bakke kom heilt frå Sandnes berre for å vera med på marknaden.

– Venninna mi Tatiana frå Ukraina bur her, og ho inviterte meg til å bli med, så då gjorde eg det, fortalde ho.

Dana stilte med handmåla julekuler og trekunst laga av ho og familien.

Rosendal bygdelag hadde laga handlenett med ord og uttrykk frå Rosendal.

– Vi har sett at andre har laga med ord og uttrykk frå sine stader, og så sa ei venninna av meg at vi skulle hatt sånn i Rosendal òg, så då tok eg det vidare, fortalde leiar i bygdelaget Solveig Hus Hansen, og la til;

– Vi har fått inn ein del uttrykk frå folk rundt om, så det er eit felles prosjekt. For eksempel «skykkjeskukkjen» er jo eit ord som er veldig gøy å få austlendingar til å seie, ler Hus Hansen.

Dei hadde ikkje fått nettene før julemarknaden, men tok imot tingingar og lovde levering i god tid før jul.

– Vi har hatt veldig god respons. Vi bestilte berre 100 stykk i første omgang, og har allereie seld 50, sa Hus Hansen.

Ho ser for seg at netta skal vere fast inventar og at folk kan bestilla dei utover året, ikkje berre til jul.

– Det er ikkje godt å vita kva vi finn på neste gong, avslutta ho med glimt i auga.