25-årsfest frå Kvinnherad til Mongolia

Rosendal Samfunnshus var stappfullt under 25-årsfesten til Kvinnherad turlag. Hovudattraksjonen var føredraget med eventyraren Jens Kvernmo.

Heile 190 gjester hadde meldt seg på laurdagens fest for Kvinnherad turlag. Til stades var sjølvsagt også dei fire som har vore leiarar gjennom desse 25 åra; Terje Hellingsrud, Anne Kari Enes, Kjell Yri og Jarle Røstbø.

– Har Kvinnherad turlag blitt som ein håpa på ved oppstarten? undra Grenda.

– Meir enn det, meinte Enes.

Hellingsrud var heilt samd.

– Berre sjå på alle som sit her inne no og det mangfaldet dei representerer utover heile kommunen, sa han.

Kvinnherad turlag har 900 medlemmer i jubileumsåret. Kvartetten vart spurd om kor mange innmeldte dei hadde fyrste året.

– Anne Kari har kontroll på alt det historiske, meinte Terje Hellingsrud, og hadde heilt rett.

– 326, kom det nemleg kontant frå kollegaen.

Frivilligheita

På programmet stod både oksegryte frå Bra lunsj, festtale av Jarle Røstbø, diktlesing av Kjell Yri, song, mimring og leik.

– Det er himla mykje å gle seg til, lokka konferansier Mari Teigen Varanes.

– Kvifor er vi her?, spurde ho retorisk, og trekte tråden heilt attende til 1974 då hytta Fonnabu vart bygt.

– Saman med hytta reiste det seg òg ein idé om at Kvinnherad trengte eit turlag, forklarte ho.

Dette vart fyrst realitet mykje seinare, men den 5. november 1998 vart Kvinnherad turlag stifta.

– Vi feirar 25 år med turar i ruskevêr og solskin. Turar for dei yngste og dei aller eldste, og alle mellom der. Vi feirar at vi bur i Kvinnherad. Vi har kanskje verdas største og kulaste leikeplass rett utanfor dørene. Men aller mest feirar vi frivilligheita og dugnadsånda. Utan frivilligheita – inga turlag, sa Varanes.

Store slavesjø

Så var det klart for Jens Kvernmo, eventyraren som har blitt kjent for sine fjernsynsprogram frå både norsk og kanadisk villmark. 38-åringen frå Steinkjer presenterte føredraget «Jens og urfolket», som baud på opphald hjå urfolk i Canada, Grønland og Mongolia.

– Det gjekk gæli ganske tidleg, smilte han, og viste til interessa for turar, jakt og fiske som han arva frå bestefar sin.

– Når eg blir 90 vil eg sitja i godstolen og tenkja på at eg har levd livet og gjort alt eg hadde lyst til, opplyste Kvernmo.

I 2015 bestemte han seg difor for å bruka fem år på å leva av og i naturen. No har det blitt åtte år. Det fyrste eventyret gjekk til Store slavesjø i Canada. Det andre året han var der kryssa han tundraen, ei reise på 1200 kilometer, utan å møta andre menneske. Han hadde berre med seg to hundar.

– Det var ei fantastisk villmarksoppleving, slo han fast.

To gamle hestar

Etterpå reiste han til Grønland for å læra om inuitt-kulturen. Han erfarte at ingen der oppe stressar, men er lukkelege og lever i nuet. Kvernmo fortalde mellom anna om då han fekk vera med på kvalfangst, ei reise som starta med å køyra hundespann 12 mil ut på isen. På det minste var isen berre 3-4 centimeter tjukk.

I år har Jens Kvernmo vore i Mongolia. Der kjøpte han to hestar som han trudde var 7-8 år gamle, men det viste seg at begge var over 20 og ikkje vane med ryttarar. Men det løyste seg fint. Og etter mange veker på tur i villmarka, på leit etter reinfolket, lukkast han.

Men trass alt det spennande han har opplevd, understreka han til slutt:

– Eg tenkte på det då eg kom hit i dag, dåke lever i eit paradis. Ein treng ikkje reisa til andre sida av kloden.