Baroniet vert freda

Vedtaket var i samsvar med innstillinga frå fylkesrådmann Rune Haugsdal. I protokollen heiter det at fredinga vil sikra ein særs verdful kulturhistorisk heilskap. Fredinga gjeld heile den samla eigedomen til Baroniet som ligg rundt den freda hovudbygningen, samt to enkeltbygningar utanfor denne; sjenefloren i Muradalen og eit naust i sjøkanten.

Området ligg på begge sider av Hattebergselva, og omfattar hage, park og jordbrukslandskap. I tillegg bygningar som avlsgarden, vognhus, ymse uthus og lysthus, samt husmannsplassen Treo.

– Det er lagt vekt på å koma fram til eit fredingsforslag som tek i vare dei nasjonale verdiane, og som samtidig legg til rette for utnytting av eigedomane. Fredinga grip ikkje inn i eksisterande bruk, heiter det i saksutgreiinga til fylkesrådmannen.

 

Fell bort

Det vert elles opplyst at det nye forslaget avløyser fleire tidlegare igangsette fredingssaker. Deriblant den varsla kulturmiljøfredinga som skulle gjelda eit større område, inkludert ein del omliggjande privateigde gardsbruk. Denne saka har Grenda skrive mykje om tidlegare.

– Dette møtte til dels stor skepsis lokalt, og arbeidet er aldri ført fram til eit ferdig fredingsforslag, vert det opplyst.

Fylkesrådmannen fortel at desse planane no fell bort. Men fylkesutvalet tok med ei oppmoding til Kvinnherad kommune i vedtaket på torsdag. Den går ut på at kommunen må ta omsyn til Baroniet og til den landskapsmessige og kulturhistoriske heilskapen i arealplanar for områda rundt Baroniet sin eigedom.

Same dag vart også Forum kino i Bergen og Stødleterrassen i Etne freda.