Biblioteket feirar 30 år
Kvinnherad bibliotek feirar 30-årsjubileum laurdag 8. desember. Det feirar dei med full rulle for store og små heile dagen til endes.
– Det vert juleverkstad, teater, trekking av teiknekonkurranse og jubileumsmarkering, heiter det i ei pressemelding.
Artikkelen held fram under annonsen.
Dagen byrjar med skrivekurs for born mellom 8 og 12 år laurdag morgon. Eit kurs som vert leia av Christin Grillstad Prøis.
– Deretter vert det familieteater med teatergruppa Kaos-operatørane. Dei viser stykket «Heksagon og julestria» som er ei varm og stemningsskapande førjulsframsyning om ventetid og vennskap, skriv biblioteket i pressemeldinga.
Vidare er det klart for teaterframsyning nummer to denne laurdagen.
– «Jul i Piratbukta» er ei morosam førjulsframsyning med dombjellerisling og kordeklink i ei salig røre. Madam Muskel og Karsen Krutt ynskjer seg besøk av julenissen, men er dei snille nok?
Jubileumsdagen vert på passande vis avslutta med kaker, kaffi og jubileumsfeiring. Vokalgruppa Glimrah står for underhaldninga, medan fotograf Jo Straube skal halda eit foredrag om det Norske biblioteket.
– Vi håpar mange teke turen og feirar saman med oss, står det avslutningsvis i pressemeldinga.