Boka kom i siste liten
Grunna problem med innbindinga såg det ut til at julesalet skulle gå skeis. Men to dagar før julaftan kom endeleg boka til Magnar Hjelmeland og Lars Børge Sæberg frå trykkeriet.
«Utvandringa frå Omvikdalen», med undertittelen «1850-1976», handlar naturleg nok om alle dei som reiste frå Omvikdalen for å busetja seg i Amerika. Også etterkomarane deira er omtalte, så langt lokalhistorikar Magnar Hjelmeland har klart å snusa fram. Prosjektet starta for nærare 20 år sidan.
– Kor tid var det eg fekk meg datamaskin? Var det rundt år 2000? spør Magnar kollega Lars Børge Sæberg.
Artikkelen held fram under annonsen.
– Ja, men du byrja med arbeidet nokre år før det også, svarer sistnemnde.
– Då sa du at om eg klarte å slå maskinen av og på, så var eg kome langt, ler Magnar.
– Og det hadde eg jo rett i, kontrar Lars Børge.
Fleire namn
Ordvekslinga føregår under karane sin stand i Varehuset Rosendal på vetle-julaftan. Endeleg kunne dei presentera verket for ålmenta. I løpet av dagen hadde bokhandelen tvers over gata allereie seld éin kartong av opplaget på 200.
Med utgjevinga har Magnar Hjelmeland sitt langvarige forskingsprosjekt kome i mål.
– No er det slutt for mitt vedkomande, prøver han seg.
Men Lars Børge røper at Magnar allereie har funne fleire tillegg.
Artikkelen held fram under annonsen.
– Han ringde her om dagen og hadde funne fram til fleire namn. Så det er ikkje slutt med dette. Arbeidet vårt har sjølvsagt store manglar, men boka gjev eit grunnlag for folk å leita vidare i eiga slekt eller andre slekter for den saks skuld.
Då karane i februar presenterte prosjektet i Dalheim, fiska Kristian Bringedal etter eit framhald om utvandringa frå Uskedalen.
– Eg kan hjelpa til, men dei må stilla med folk sjølve, smiler Magnar til oppmodinga frå kultursjefen.
Overraskingar
Undervegs i det spennande arbeidet dukka det også opp nokre historiske overraskingar. Visste du til dømes at ei dame frå Sponhaug vart ambassadørfrue i Holland?
– Sjølv var ho født i Illinois, men begge foreldra kom frå Sponhaug. Ho gifta seg med ein danske, opplyser Magnar Hjelmeland.
– Magnar har òg funne fleire frå Omvikdalen som deltok i den amerikanske borgarkrigen, skyt Lars Børge Sæberg inn.
Boka si framside er dekorert med bilete av ei dame frå Lund som reiste ut i 1876 og familien hennar. Ho var halvsyster til bygdas store son, forfattaren Jens Tvedt. Mannen på biletet kom frå Sarane.