Bokbad med Staalesen og Tvedt
Torsdag kveld inviterer Rosendal Bokhandel til møte med to av dei fremste krimforfattarane i fylket.
Det blir krimkveld i Rosendal turisthotell, med Gunnar Staalesen og Chris Tvedt i hovudrollene. I tillegg til å lesa og fortelja frå sine nye bøker, skal dei også setja kvarandre stemne.
Artikkelen held fram under annonsen.
– Begge er aktuelle med nye, og etter mi meining gode, bøker. Det som blir litt annleis med denne krimkvelden, er at blir eit bokbad, der Tvedt og Staalesen samtalar med kvarandre om både dei siste bøkene og forfattarskapane deira. Eg trur det vert ein annleis og spennande vri på arrangementet, fortel Bente Soldal ved Rosendal Bokhandel.
Kvelden med krimforfattarane vert ikkje det einaste arrangementet hennar i år. I adventstida kjem ho til å skipa til treff med Anders Totland, Lene Mehl og Veronika Erstad.
– Eg syns det er svært bra at tre lokale forfattarar kjem med barnebøker denne hausten, skryt Soldal.