Budeiene på Kjeldestøl

Seks onsdagar og éin søndag i sommar er det budeier til stades for å ta i mot besøkande på Kjeldestøl. Det har vist seg å vera eit svært populært tilbod.

Kvar gong er det tre budeier som tek turen opp til den gamle stølen i Skaaladalen ved Rosendal. Førre søndag var det Ingeleiv Klette, Anne Lise Nygård og Kristlaug Bjørke som lokka med kaffi, saft, mjølkekaker og andre godbitar (også Kirsten Skaala er med i gjengen). Akkurat denne dagen regna det meir enn godt er, men likevel var det kring 30 besøkande oppom. Blant dei var det både kvinnheringar og turistar, mellom anna to familiar som låg med båt i Rosendal Hamn.

Ny rekord

Tiltaket vart innført i fjor, og responsen overgjekk alle forventningane til Kjeldestøl venelag, som står bak restaureringa av sela på staden. Men på dei fyrste opne dagane i år har det i snitt vore 30 fleire gjester enn i fjor, noko som er heilt eineståande. Onsdag for to veker sidan vart det sett rekord med 80 personar. Då var det sjølvsagt svært travelt, men også veldig kjekt for budeiene.

Arbeidet med å byggja opp att Kjeldestøl er elles godt i rute. Fram til utskiftinga i 1951 var det sju sel der oppe. Eitt sel har stått der heile tida, medan venelaget så langt har sett opp fire. Dei to siste, Torkjellsselet og Peraselet er under arbeid. Tømmeret til Torkjellsselet vart skore på Vangssago i fjor haust og ligg no til tørk. På Peraselet er arbeidet med å vøla steinmurane i full gang. Vonleg vert begge sela opna neste sommar.