Byr på stemningsfull konsert i Helgheim
På laurdag er det duka for musikalsk påfyll i Uskedalen. Då skal nemleg vokalensemblet Glimrah og trioen Maskros ha konsert.
Etter sju års samsong med base i Kvinnherad er truleg Glimrah godt kjend for mange.
Kvinnene som utgjer den vokale samansettinga i ensemblet er Gjertrud Sydnes Furdal, Lene Taranger, Ingvild Toskedal, Lina Frimannslund Storegjerde, Hallgjerd Kofoed Hegland og Sylvie Hjelmeland. Maria Malmsten er kunstnarleg og syngjande leiar.
Artikkelen held fram under annonsen.
Repertoaret dei serverer denne kvelden kjem attåt kaffi og heimebakst; vakre sommarsongar, folketonar, renessansemeldiar og ein skvett populærmusikk.
Fann tonen
Gjestetrioen Maskros supplerer den musikalske torettaren med kjende og ukjende folketonar og -viser, eigenskriven musikk og drikkeviser.
Det er Ida Wahl (vokal), Frida Tømmerberg (vokal, fele) og Tiril Eirunn Einarsdotter (vokal, fele og hardingfele) som utgjer trioen.
«Dei tre venene møttes på musikkstudiet i Stavanger, og fann tonen gjennom den felles interessa deira for folkemusikk. Saman skriv Ida, Frida og Tiril eigne arrangement og komposisjonar med utgangspunkt i skandinavisk tradisjonsmusikk. Med song og feler som einaste instrument, dannar trioen eit lyst og minimalistisk lydlandskap», informerer Malmsten i ei pressemelding.
I tillegg til at dei ulike einingane framfører sitt eige, lovar dei også å musisera litt i lag. Det vert elles loddsal med gøyale vinstar denne kvelden.
«Velkomne på konsert, me gler oss stort», helsar arrangøren.