Designarspire får kulturstipend

Aleksander Sahr frå Husnes får 50.000 kroner til å jakta draumen om å bli klesdesignar.

Tildelingsgruppa for Kvinnherad kulturstipend har hatt 11 søkjarar å velja mellom, og melder at dei fekk mange gode søknader.

– Aleksander er ein ung og lovande kandidat som syner at han tør å satsa på draumen. Han er eit lovande talent, og alt han føretek seg syner medviten jobbing mot målsetjinga. Aleksander representer ei utrykksform som ikkje har fått tildelt Kvinnherad kulturstipend før, heiter det i pressemeldinga frå tildelingsgruppa.

Den 22 år gamle husnesingen studerer for tida «Klesdesign og Kostymedesign» ved kunsthøgskulen i Oslo. Etter skulegangen i Kvinnherad flytta han vekk for å studera. Han har gått på lina for «Bilde, Form og Kunst» ved Solborg folkehøgskule og no tek han ein bachelorgrad ved kunsthøgskulen.

– Aleksander søkjer om Kvinnherad kulturstipend for å fulløra bacheloroppgåva si. Stipendet vil gje Aleksander større fridom i arbeidet med oppgåva, seier tildelingsgruppa.

Kvinnherad kulturstipend er eit samarbeid mellom Sparebank1 SR-Bank, Sunnhordland kraftlag, Hydro Husenes, Sparebanken Vest og Kvinnherad kommune. Tildelingsgruppa for årets stipend har vore Synnøve Handeland frå Sparebank1 – SR bank, Jan Petter Myhre frå SKL, Eli Haugan frå Kvinnherad kulturskule og Linda Øen frå Kvinnherad kulturkontor.

– Å få tildelt Kvinnherad Kulturstipend er ei stor ære, og eg kan nesten ikkje tru det! Eg syns det er modig av kommunen og satsa på design – og meg – i år, og det gjer meg ekstra stolt å være kvinnhering. Eg takkar for tilliten, og eg gleder meg til å visa kva eg kan få til med 50.000 kroner, seier Sahr til Grenda.