– Dette vert knall

Sjølv om det er tendensar til kaos dagen før premieren har revygeneral Karianne Solheim klokketru på at årets sommarrevy «Lika bli» vert ein suksess.

– Det er kaos og framleis mykje som står igjen, men det er slik det skal vera på denne tida. Ting skal ikkje gå på skinner og det skal vera litt stress før premieren. Men vi er veldig positive, det er sol og fint vêr og alt ligg til rette for at dette vert knallbra, seier Karianne.

Travelt

Saman med sambuar Nils Trygve Markhus, Trond Thorsen og siddis Kristian Arntsen flytta ho inn i revyteltet ved Husnes Camping fredag i førre veke. Sidan då har dagane gått i intens øving og fleire gjennomkøyringar for å kunna gje kvinnheringane ein best mogleg revy.

– Det er travle dagar og mykje som skal ordnast. Eg var ein tur å leverte ungane og handla litt på butikken i dag tidleg, og på den korte tida hadde eg seks telefonsamtalar. Men det er sånn vi liker å ha det. I kveld er det generalprøve for russen, så no skal eg berre ha i meg ei brødskive før eg skal ned igjen i teltet, seier Karianne.

Utselt premiere

Sjølv om ho ikkje vil røpa for mykje om kva som skal skje på scena, lover ho lokale innslag, musikk og eit par gamle kjenningar.

– I år har vi faktisk ikkje berre rolp på menyen, Nils har laga ein veldig fin song og vi vil ha eit par seriøse nummer. Men utanom det vert det mykje rolp og humor. Blant anna kjem Petrusjka på besøk og skal rydda opp i kommuneøkonomien og Mannen frå Huglo har fått seg ny jobb. Så det er berre å gle seg, det gjer i alle fall vi, seier ho.

Og om du ikkje har tinga deg billett til ei av dei ni revyførestillingane enno, byrjar det å hasta.

– Billettsalet går som det susar. Begge dei to første førestillingane er utselt, og meir enn det. Men det er enno billettar igjen til nokon av dagane, så om ein vil få revyen med seg er det berre å få fingeren ut, sluttar Karianne.