Dokketeater engasjerte
81 år gamle Mette Wernøe veit å fanga merksemda til borna når ho framfører dokketeaterstykka sine. Med 40 års erfaring innan faget er ikkje det så rart.
Wernøe hadde to framsyningar på Baroniet i helga. Grunna vêret var teaterstykka flytta inn frå borggarden til borgstova, som sette ei intim og koseleg stemning.
Artikkelen held fram under annonsen.
– Kva heiter du? Og du? Og du då?
Mette tok heile runden og noterte ned alle namna på dei spente borna som var komne for å sjå «Kaspar i Afrika». Allereie før framsyninga hadde ho vunne tilliten til dei små.
Mannen manager
Mannen til Mette, Kjell Wernøe, har store namn i porteføljen når det kjem til management, med klassiske musikarar som mellom anna Leif Ove Andsnes. Og så er han manager for kona si òg. Kvart år reiser dei til Kenya og held dokketeaterkurs for skuleelevar. «Kaspar i Afrika» handlar om ein gut i Kenya som mellom anna skulle fanga ein slange.
– Du kan putta eit lokk på krukka så slangen ikkje kjem seg ut! ropte ein av dei engasjerte tilskodarane.
Etterpå fekk alle koma fram og undersøka dokkene. Ei koseleg stund for dei minste, og foreldra humra med dei òg.