– Ein dag for å minnast dei døde

På søndag er det Helgemesse. Det er ein dag for å minnast dei som er døde, og i kyrkjene i Kvinnherad vil ein minnast dei som er døde sidan førre minnegudsteneste.

 

– Vi vil lesa dei opp med namn og tenna lys for dei i gudstenesta. Dei pårørande frå det siste året er særskilt inviterte. Men alle som saknar nokon er velkomne i kyrkja til å minnast dei.

Mange tenner lys på kyrkjegarden ved Helgemesse, og fleire kyrkjer vil halda ope ei stund på søndag, viss du ynskjer å koma inn for ei stille stund, eller vil tenna eit lys eller prata med nokon, opplyser Kjersti Brakestad Boge, sokneprest i Kvinnherad

Ænes og Hatlestrand kyrkje vil vera opne frå kl. 15-17. Ølve kyrkje er open éin time før gudstenesta, og i Kvinnherad kyrkje er det ope frå gudstenesta og fram til kl. 15. I Kvinnherad kyrkje vil det også vera litt fløytespel av Kristine Hestad.

– Sorga er skuggen etter kjærleiken som var. Det er godt å minnast dei vi saknar og det er godt å vera saman i sorga. Velkomen, helsar soknepresten.