– Ein sjanse for kulturutøvande ungdom

Verksemdleiar for kultur og fritid Linda Øen håpar flest mogleg vil melda seg på UKM (Ung kultur møtest) innan fristen 20.januar.

– Ingen er for dårlege eller for gode til å bli med. Dette er ein kjekk sjanse for å prøva seg på ein liten eller stor scene. Vi vil leggja til rette slik at alle skal få ein scene som passar for seg, seier ho.

Festidalen er også med på laget under årets UKM, der Una Kolle har teke rolla som prosjektleiar. Mønstringa vert lagt opp etter same leist som i fjor på den måten at UKM skal vera ein samlingsplass der ein skapar ein scene der ungdom mellom 13-19 år kan visa fram kulturuttrykka sine.

– I fjor hadde vi tre scenar, men denne gongen vil vi høyra med dei som melder seg på om kva dei ønskjer, seier Øen.

 

Førebuing

Laurdag 4. februar vert det førebuingar og workshops i blant anna ljos og lyd, sceneframføring og kanskje i dans om ein får det til. Søndag 5.februar føregår sjølve mønstringa i det som før heitte Ungdomens kulturmønstring, men som no har fått namnet Ung Kultur Møtest. Ungdomane kan til dømes bidra med dans, musikk, teater, stand up, film og kunst.

– Vi er interesserte i alle former for kreative innslag, og skal leggja til rette for det som kjem. Ein kan også melda seg på som konferansier eller arrangør for å få eit innblikk i den praktiske gjennomføringa av eit kulturarrangement, seier Øen som håpar flest mogleg melder seg på til årets mønstring.