Eva Weel Skram til Hellebergshillaren

– Me gler oss. Det vert veldig kjekt å få ein så aktuell artist til hillaren, seier John Ulvenes i konsertnemnda.

Eva Weel Skram utgjer saman med Thomas Stenersen bandet Eva & The Heartmaker. Denne kvelden spelar dei som akustisk duo, noko som gjev publikum ein unik sjanse til å oppleva dei frå ei meir intim side enn ein kanskje er vane med.

– Me håpar på at det kjem mykje folk frå bygdene omkring, seier Ulvenes, som saman med kona Vigdis og Hans Inge Myrvold utgjer konsertnemnda.

Det er gjennom artistbyrået Stageway og manageren Arne Svare, som har hytte på Hatlestrand, at dei har fått booka Eva Weel Skram. Og det er i høgste grad ein aktuell artist som kjem. Ho var gjest i årets sesong av «Hver gang vi møtes» på TV2, i godt selskap med Wenche Myhre, Ravi, Admiral P., Henning Kvitnes, Jørn Hoel og Unni Wilhelmsen.

Popperler som «Signals», «Calling You» og «Joanna» har alle dominert radiolistene og fylt øyregangane til folk, og 15. juli skal dei serverast midt i tjukkaste Ølve-skogen.

I 2014 leverte ho ein strålande konsert på Festidalen, og det er lov å ha forventningar til det same i det gamle klebersteinsbrotet.