Festidalen og OmStock går saman om Lambasleppet

Årets utgåve av Lambasleppet flyttar til Husnes og vert eit samarbeidsprosjekt mellom OmStock og Festidalen.

Sidan 2015 har frivillige krefter i Festidalen bygd opp og utvikla konseptet Lambasleppet. Ei kultursatsing kor lokal og regional ungdom får prøva seg på ei proff utescene med stort publikum. Samstundes som dei har konkurrert om premiar som stipend, studiotid og spelejobb på ein bransjefestival. No går Festidalen saman med festivalarrangørane i OmStock for å gje konseptet ei breiare plattform.

– Me som er arrangørar i kommunen må stå saman, støtta kvarandre og utvikla kvarandre. Og ikkje minst stimulera ungdomen mot ei auka kulturinteresse. Det er mange flinke arrangørar her alt, og me treng i alle fall ikkje færre. Då må vi heller, gjennom samarbeid, bidra til at fleire finn sin «indre arrangør», skriv bookingansvarleg Daidalos frå Festidalen i ei pressemelding før han held fram:

– At OmStock og Festidalen fortsett bygginga av Lambasleppet saman gir artistane eit større nedslagsfelt, og arrangørane ei fin sluse for kompetanseutveksling.

For publikum og artistar betyr samarbeidet i praksis at det vert arrangert fredagen under OmStock.

– På ei ny scene på Husnes. Gratis og ope for alle. Det femte Lambasleppet rullar fram under parolar om samhald og kjærleik. Og fredag 7. juni står det klart for folk og fe, heiter det i pressemeldinga.

Går du med ein indre draum om å lukkast med musikken din, oppmodar både Festidalen og OmStock deg om å melda deg på årets utgåve av Lambasleppet.

– Gira på å stå på denne scena? Skal du bli ein slags kvinnhersk Eminem, Cardi B, Ozzt eller Robyn?