Folkeopplysning om covid-19 i senioruniversitetet

Kvinnherad Senioruniversitet inviterer til opent møte på Husnes 11. mars. Til møtet kjem Henriette Christie Ertsås for å fortelja om covid-19, vaksinering og vaksineskepsis.

Henriette Crhstie Ersås frå «Forsking til Folket» har doktorgrad i kreftforsking og hovudfag i virologi. Med ein master i skodespel i tillegg, gjer det ho godt eigna til å formidla avansert naturvitskap til folket. Torsdag 11. mars tek ho turen til Kvinnherad Senioruniversitet for å snakka om covid-19, vaksinering og vaksineskepsis.

– Du treng ikkje vera innbiten vaksinemotstandar for å føretrekka plass sist i koronavaksinekøen. Vaksineskepsis frå avkrokar på internett finn vegen heilt ut til etablerterte media. Det er forståeleg at du nøler. Då må vi som har brukt all verdas tid på å forstå virus kunne forklara kvifor vaksine faktisk er bra for deg. No har du moglegheita til å stilla spørsmåla du lurer på, står det å lesa i ei pressemelding frå senioruniversitetet.

Føredraget startar med Ertsås i rolla som Dr. Kvakk Salver som entrar scena og tilbyr ein heilt ny koronatest. Blir du blenda av blinkande lys og gøyal marknadsføring, eller kjem din kritiske sans deg til unnsetning? Det og mykje meir informasjon om covid-19, vaksinering og vaksineskepsis står på planen når Kvinnherad Senioruniversitet inviterer til føredrag 11. mars.

– Arrangementet vil følga dei gjeldande smittevernreglane. Det betyr eit avgrensa tal tilhøyrarar, spriting av hender ved inngangen og registrering av publikum, skriv Kvinnherad Senioruniversitet i meldinga.