Fortent fest for Kaare Skaala
Det vart ein kveld med høgtidsam heider då Kaare Skaala fekk overrekt fortenestemedaljen frå Kongen.
Torsdag kveld hadde ordførar invitert til medaljeoverrekking av fortenestemedaljen til Kaare Skaala. Det vart ein verdig seanse for ein verdig medaljemottakar.
– Me er komne saman for å heidra ein stor personlegdom i Rosendal, og for å heidra ein eineståande innsats på mange samfunnsområde over lang tid, sa ordførar Peder Sjo Slettebø då han opna sin tale til Skaala.
Artikkelen held fram under annonsen.
Kvalitetar
Ordføraren peika på sterke praktiske og åndelege kvalitetar hos medaljemottakaren, og at Skaala meistrar eit breitt spekter av felt.
– Me har alle eit forhold til historia, og særleg er me opptekne av vår lokale historie. Utan nyfikne og kunnskapsrike menneske som legg eit særleg arbeid i å formidla lokal historie, hadde me vore fattigare som lokalsamfunn. Kvinnherad-samfunnet har ei rik historie, og Kaare har vore ein viktig bidragsytar for å få denne belyst. Særleg innanfor det kyrkjelege har han gitt store bidrag, poengterte ordføraren før han festa den skinnande medaljen på jakkeslaget hans, og overrekte diplomet frå Kong Harald V.
Ti forslagsstillarar
Medaljemottakaren hadde lagt ned strenge føringar for korleis festen skulle vera. Maksimalt 25 medlemmer, toppen halvannan time og ikkje for høgtidleg. Han fekk det stort sett som han ynskte.
– Eg er både glad og brydd. Glad for å bli sett pris på, brydd fordi eg og de veit det er mange som legg ned mange timar frivillig arbeid utan at projektoren vert vendt mot dei, sa Skaala.
Artikkelen held fram under annonsen.
Han takka kona Kirsten for at ho hadde late han gjennomføra alle desse prosjekta sine.
– Ho stelte med 35 storfe medan eg var frikar og gjorde mine ting, og tok seg av fem barn i tillegg, rosa han.
Brevet som foreslo Kaare Skaala til fortenestemedaljen er sendt på vegne av ti forslagsstillarar. Rosendal Turnlag- Turgruppa, Kvinnherad Mållag, Kjeldestøl Venelag, Rosendal Turnlag, Uskedalen Sokneråd, Kvinnherad Sokneråd, Rosendal Musikklag, Rosendal Songlag, Kvinnherad kommune og Rosendalstiftinga har alle vitna for 82-åringen sine bidrag.
Både Morten Nygård og Øystein Skaala tok ordet og snakka forsamlinga gjennom fleire av bidraga til Skaala.
– Dette er ein av dei minste overraskingane ein kunne fått, meinte Øystein Skaala.
I tillegg til næraste familie var representantar frå dei ulike forslagsstillarane med på festen. Menyen denne kvelden var snittar, kake og kaffi.