Furuholmen klar for Guddal

Etter nett å ha avslutta Festspillene i Bergen og halde to akustiske konsertar med A-ha på Giske, er Magne Furuholmen no klar for Guddalstunet.

Gøril Guddal har etter kvart stått for mange store utstillingar, både i dei førre lokala i Rosendal og etter at ho flytta heim til Guddal. Men utstillinga med Magne Furuholmen, som opnar på laurdag, kan fort bli eit av dei aller største høgdepunkta.

– Han kjem til å fylla heile galleriet med måleri, grafikk og skulpturar. Vi tar også i bruk eit heilt nytt utstillingslokale denne dagen. Eit lite steinhus (gamal stall) i tunet er pussa opp, og der vil ein kunna sjå nokre av skulpturane, opplyser Gøril i ei pressemelding.

Sjølv om Magne Furuholmen er verdskjent som tangentspelar og komponist i A-ha, har han heile tida vore ein aktiv og anerkjent kunstnar samstundes. Han debuterte som biletkunstar i 1989, og har sidan halde eit høgt tempo med verk utstilt i Nasjonalgalleriet, Museet for samtidskunst, Neue Nationalgalerie i Berlin, Mac-Niteroi Brazil, Royal Academy i London, og Central Academy for Fine Arts i Beijing, for å nemna nokre.

 

St. Olavs Orden

– I 2016 blei Furuholmen sitt til no største oppdrag; Imprints, ein skulpturpark med 70 tonn keramiske skulpturar offisielt opna i Aker-kvartalet på Fornebu. Fjoråret markerte også eit større kunstnarleg samarbeid med HM Dronning Sonja, med utstillingar i Bergen, Trondheim og London, til inntekt for QSPA - The Queen Sonja Print Award, vert det opplyst i pressemeldinga.

Det er elles verdt å nemna at Furuholmen fekk prisen for beste grafiske arbeid ved Høstutstillingen i 1996. I 2012 vart han tildelt St. Olavs Orden, riddar av 1. klasse, for sin innsats for norsk kultur.

Furuholmen vil sjølv opna utstillinga i Guddal. Det vert også musikk av folkemusikktrioen Folkelokk frå Hardanger. Utstillinga kan ein sjå kvar dag frå 1. juli til 20. august.