Gjer stas på prisvinnarar med gratiskonsert

Laurdag 8. september inviterer Kvinnherad Frivilligsentral, Kvinnherad kommune og Kulturhuset Husnes til «Den store jubelkonserten».

– For å gjera meir stas på prisvinnarane våre så ynskjer vi å slå alle prisutdelingane i lag til ein og same kveld. Ein kveld der vi også inviterer til ein gratiskonsert med Marion Woodseth og Matti Røssland på dagtid, og eit arrangement med dei same artistane på kveldstid, seier leiar Veronica T. Thorsen i Kvinnherad Frivilligsentral.

På dagtid vil vinnaren av kulturprisen, kulturstipendet og frivilligprisen bli heidra i kinosalen, før Røssland, Woodseth og elevar frå kulturskulen vil visa seg fram på scena. Etter det vert vinnarane saman med vener og familie heidra med middag i Festsalen.

– Tanken er at dette skal bli eit fast opplegg. Eit arrangement der vi både ynskjer å gjera meir stas på prisvinnarane i tillegg til at vi får vist fram artistar frå Kvinnherad. Der er det òg viktig for oss å få vist fram mykje av det kulturskulen har å by på. Og så er det jo også for å få noko til å skje. Så vi håpar at folk ynskjer å bli med på denne dagen, både på dag og kveld, sluttar Veronica.

Frå kulturskulen kjem Vibeke Escher, Jan Halvor Postigo Moss og Michero Marimba på gratiskonserten, medan den talentfulle trommeslagaren Johannes Røyrvik Grov entrar scenen på kveldsarrangementet saman med trommelærar Mauricio Weimar.